მელიტოპოლში საოკუპაციო ძალების წარმომადგენელი, ე.წ. მერი ჰალინა დანილჩენკო აცხადებს, რომ ქალაქი რუსეთთან შეერთების "რეფერენდუმისთვის" ემზადება. უკრაინული მედიის ცნობით, ამის შესახებ მას შემდეგ ისაუბრა, რაც ზაპოროჟიეს რეგიონს ვლადიმერ პუტინის ადმინისტრაციის უფროსის პირველი მოადგილე, სერგეი კირიენკო ეწვია.

მისი მტკიცებით, ქალაქი "მშვიდი ცხოვრებით ცხოვრობს" და თითოეული მოქალაქე ახალი ცხოვრების შენებაშია ჩართული.

პარალელურად, დღეს მელიტოპოლის მერმა, ივან ფედოროვმა ისაუბრა, რომ რუსმა დამპყრობლებმა ქალაქში საკომუნიკაციო არხები და ინტერნეტი დაბლოკეს. მისი თქმით, უკრაინელი სამხედროები ყველაფერს აკეთებენ, რომ ქალაქი გაათავისუფლონ.

ოკუპანტებმა დანილჩენკო მელიტოპოლის ე.წ. მერად ივან ფედოროვის გატაცების შემდეგ, 12 მარტს დანიშნეს. ფედოროვის რუსული ტყვეობიდან 16 მარტს გაათავისუფლეს.