ქართულ და საერთაშორისო საგანმანათლებლო სივრცეს ახალი სამედიცინო უნივერსიტეტი შეემატა. თბილისში დაარსდა და ფუნქციონირება დაიწყო კენ ვოლკერის საერთაშორისო უნივერსიტეტმა (Ken Walker International University — KWIU). უნივერსიტეტი სრულად არის საერთაშორისოდ აკრედიტირებული სამედიცინო განათლების მსოფლიო ფედერაციის (WFME-ის) სტანდარტების მიხედვით და სტუდენტებს სთავაზობს 2 ინგლისურენოვან პროგრამას მედიცინასა და სტომატოლოგიაში. პროგრამების კატალოგს შეგიძლიათ გაეცნოთ მითითებულ ბმულზე.

ჰენრი კენეტ ვოლკერი გახლდათ ემორის უნივერსიტეტის მედიცინის, ნევროლოგიისა და გლობალური ჯანდაცვის სკოლის (აშშ, ატლანტა) პროფესორი, თბილისისა და საქართველოს საპატიო მოქალაქე. პროფესორი კენ ვოლკერი გლობალური ჯანდაცვის სფეროს მიმართულებით მუშაობდა სხვადასხვა ქვეყანაში, მათ შორის საქართველოში, სადაც მისმა ჩართულობამ და შრომამ ჯანდაცვის სისტემაში განხორციელებულ მნიშვნელოვან განვითარებაში სერიოზული გავლენა იქონია.

KWIU-ი მჭიდროდ თანამშრომლობს ემორის უნივერსიტეტთან, რომელიც აშშ-ს ერთ-ერთი ყველაზე მაღალრეიტინგული უნივერსიტეტია და სახელგანთქმულია მისი სამედიცინო სკოლითა და პროგრამებით. სტუდენტებს საშუალება ექნებათ, გაცვლითი პროგრამის ფარგლებში ეწვიონ ემორის უნივერსიტეტს. KWIU-ი მსურველებს ასევე ხელს შეუწყობს USMLE-ის (აშშ-ს სამედიცინო ლიცენზირების გამოცდა) გამოცდის 2 ეტაპისთვის მომზადებასა და სარეზიდენტო აპლიკაციის გაკეთებაში.

სტუდენტები ისარგებლებენ თანამედროვე ინფრასტრუქტურით, მაღალტექონოლოგიური კლინიკებითა (მათ შორის, კენ ვოლკერის სახელობის სამედიცინო რეაბილიტაციის საუნივერსიტეტო კლინიკა) და ლაბორატორიებით.

KWIU-მ დაიწყო თანამშომლობა კომპანია განათლების მართვის ჯგუფთან (EMG). შედგა შეხვედრა ემორის უნივერსიტეტის მედიცინის სკოლის ასისტენტ-დეკანთან, პროფესორ გორდონ ჩერჩვორდთან და EMG-ის გენერალ დირექტორ გივი გუნცაძეს შორის. ორი ორგანიზაცია ითანამშრომლებს სტუდენტების მოზიდვისა და უნივერსიტეტის ინტერნაციონალიზაციის მიმართულებით. KWIU-ი მიზნად ისახავს, გახდეს კონკურენტუნარიანი სამედიცინო საგანმანათლებლო დაწესებულება საერთაშორისო ბაზარზე და მისცეს სხვადასხვა ქვეყნის მოქალაქეს საშუალება, მიიღოს უმაღლესი ხარისხის სამედიცინო განათლება და საერთაშორისო გამოცდილება KWIU-ის საერთაშორისო მრავალ პარტნიორთან ერთად.

EMG-ის ხელშეწყობით, ასევე, გაიმართა შეხვედრა ნევადა რენოს უნივერსიტეტის (University of Nevada Reno) წარმომადგენელთან, სინდი ელიოტთან. შეხვედრაში მონაწილეობას იღებდა ემორის უნივერსიტეტის მედიცინის სკოლის საგანმანათლებლო პროგრამების დირექტორი, არჩილ უნდილაშვილი. შეხვედრაზე განიხილეს ორ უნივერსიტეტს შორის თანამშრომლობის შესაძლებლობები და სამომავლო გეგმები.