პორშე ცენტრი თბილისი ელექტროდამტენების ლოკაციების რაოდენობას ზრდის. სხვადასხვა რეგიონში უკვე არსებულ 5 სადგურს, მათ შორის ყაზბეგის, ქუთაისისა და ბათუმის თეგეტა მოტორსის სერვისცენტრებს დაემატება დამტენები. პრემიუმ კლასის ელექტრომობილის მფლობელებისთვის მანქანის დამუხტვა ახლა უფრო მეტადაა ხელმისაწვდომი.

პორშე ცენტრი თბილისი ერთ-ერთი პირველი იყო, რომელმაც ენერგოეფექტური პროექტების ფარგლებში შესაბამისი ინფრასტრუქტურის მოწყობა დაიწყო. ამჟამად, ქვეყნის მასშტაბით, კომპანიას 8 დამტენი სადგური აქვს განთავსებული. მათგან ორი თბილისშია, ამდენივე — ბათუმში, ასევე, თელავში, საირმეში, ქუთაისსა და ყაზბეგში. საერთო ჯამში, ამ მიმართულებით კომპანიამ 150 000 ლარზე მეტი ინვესტიცია განახორციელა.

"გარემოზე ზრუნვის პრინციპით წარმოებული მანქანები თანამედროვე ავტოინდუსტრიაში სულ უფრო აქტუალური ხდება. მოთხოვნა მნიშვნელოვნად გაიზარდა პორშეს ელექტრომობილებზეც. ამ პროცესის პარალელურად, აუცილებელია შესაბამისი ინფრასტრუქტურის განვითარება. პორშე ცენტრი თბილისი მუდმივად ცდილობს, მომხმარებელს ელექტრომობილის ფლობის გამოცდილება გაუმარტივოს. ეტაპობრივად ვაფართოებთ დამტენების სადგურების ქსელს. 2022-ში საქართველოს მასშტაბით დამატებით კიდევ 6 დამტენის მონტაჟს ვგეგმავთ.

მნიშვნელოვანია ისიც, რომ ჩვენ მიერ განთავსებული დასამუხტი მოწყობილობით სარგებლობა არა მხოლოდ პორშეს, არამედ სხვა ბრენდის ელექტრომობილის მფლობელებსაც შეუძლიათ", — განაცხადა პორშე ცენტრი თბილისის დირექტორმა, პეტრე წაქაძემ.

ფოტო: თეგეტა მოტორსი

პორშე ცენტრი თბილისის მიერ განთავსებული დამტენები 11 და 22-კილოვატიანია, ელექტრომობილის სრულად დასამუხტად კი 3-დან 7 საათამდე დროა საჭირო.

გერმანულმა ავტოგიგანტმა უკვე განაცხადა, რომ 2025 წლისთვის პორშეს მიერ გაყიდული ავტომობილების ნახევარი ელექტრიფიცირებული იქნება. 2030-ში კი, ელექტროავტომობილების სრული წილი ახალი ავტომობილების 80%-ზე მეტს უნდა შეადგენდეს.

პორშე ცენტრი თბილისი თეგეტა ჰოლდინგში შემავალი კომპანიაა, რომელიც ქართულ ბაზარზე 2011 წლიდან ოპერირებს. კომპანია მომხმარებელს პრემიუმ ბრენდის უახლეს ავტომობილებს, ასევე, სრულ სადიაგნოსტიკო და სარემონტო მომსახურებას, ორიგინალ ნაწილებსა და აქსესუარებს სთავაზობს.