რუსეთში არსებულ "რელიგიური გრძნობების შეურაცხყოფის" აღმკვეთ კანონს, შესაძლოა, რუსი ბლოგერის რუსლან სოკოლოვსკის თავისუფლება შეეწიროს.

ვიდეოს დასაწყისში სოკოლოვსკი გვახსენებს, რომ ეკლესიაში Pokemon Go-ს თამაშისა და შესაბამისად, პოკემონების დაჭერისთვის რუსეთში სისხლის სამართლის პასუხისმგებლობა დააწესეს და სწორედ ამიტომ მან გადაწყვიტა ექსპერიმენტი ჩაეტარებინა. სოკოლოვსკი ეკატერინბურგის ყველა წმინდანის ეკლესიაში შევიდა და იქ პოკემონი დაიჭირა.

როგორც ვიდეოში ჩანს, და შემდეგ თვითონ სოკოლოვსკიც ამბობს, მისთვის ხელი არავის შეუშლია და თამაში მშვიდობიანად მოახერხა. თუმცა მისი თავგადასავალი აქ არ დამთავრებულა. სოკოლოვსკი ვიდეოს ატვირთვისთანავე, 2016 წლის აგვისტოში დააკავეს და ის ამ დრომდე პატიმრობაში იმყოფება. მისი პროცესი 28 აპრილს დასრულდა, რომელზეც პროკურატურამ სასჯელად 3,5 წლიანი პატიმრობა მოითხოვა. სასამართლო განაჩენს 11 მაისს გამოაცხადებს.