რუსეთის უკრაინაში შეჭრისა და სრულმასშტაბიანი ომის დაწყების შემდეგ, უამრავი მშვიდობიანი მოქალაქე დაიღუპა. ერთ-ერთი მათგანი ბოროდიანკაში მცხოვრები 9 წლის გალიას დედაა, რომელსაც თავისმა შვილმა ემოციური წერილი მისწერა.

წერილი ფოტო უკრაინის შინაგან საქმეთა ყოფილმა მინისტრმა და მრჩეველმა, ანტონ გერაშჩენკომ, ტვიტერზე გამოაქვეყნა.

8 მარტით დათარიღებულ წერილში გალია დედას მადლობას უხდის და ნატრობს, რომ იგი სამოთხეში მოხვდეს.

"დედიკო, ეს წერილი შენი საჩუქარია", — წერს გალია, — "თუ გგონია, რომ ჩემი აღზრდისას უმიზეზოდ იქცეოდი, ცდები. მადლობა, რომ ჩემი ცხოვრების 9 წელი მაჩუქე. დიდი მადლობა, რომ ბავშვობა მაჩუქე. შენ სამყაროში საუკეთესო დედიკო ხარ. არასდროს დაგივიწყებ. სამოთხეში ბედნიერებას გისურვებ. ვნატრობ, რომ სამოთხეში მოხვდე. მანდ შევხვდებით. ვეცდები, ისე მოვიქცე, რომ სამოთხეში მოვხვდე. გკოცნი".

ბოროდიანკა ბუჩის რეგიონში მდებარე პატარა ქალაქია, სადაც ათასობით მშვიდობიანი მოქალაქე დაიღუპა. მსხვერპლთა ზუსტი რიცხვი უცნობია, თუმცა, ადგილობრივი ხელისუფლების შეფასებით, დაღუპულების რაოდენობა 5 ათასს აღწევს.

უკრაინის პრეზიდენტის, ვოლოდიმირ ზელენსკის განცხადებით, ქალაქში ჩადენილი სისასტიკის მასშტაბი მის მეზობელ დასახლებაში, ბუჩაში, მომხდარს აღემატება. ბუჩა რამდენიმე დღის წინ რუსეთის აგრესიის ყველაზე გულმოსაკლავ და თვალსაჩინო სიმბოლოდ იქცა — მას შემდეგ, რაც ქალაქზე კონტროლი უკრაინულმა ძალებმა აღიდგინეს, მათ აქ მასობრივი საფლავები და ქუჩებში დახოცილი ადამიანების ცხედრები იპოვეს. ქვეყნის თავდაცვის მინისტრის, ოლეკსიი რეზნიკოვის ცნობით, ბუჩაში დაღუპულების რაოდენობა 400-ს აჭარბებს.

რუსეთის უკრაინაში შეჭრის შემდეგ კონფლიქტმა ასობით ბავშვის სიცოცხლეც შეიწირა.