საინვესტიციო პლატფორმა, eToro საქართველოში ანგარიშებს ხურავს. შესაბამისი შეტყობინება მომხმარებლებს ელექტრონულ ფოსტაზე უკვე მიუვიდათ. ამასთან, საქართველო იმ ქვეყნების სიაშია შეყვანილი, რომლებისთვისაც eToro-ის ანგარიშები ახალი მომხმარებლებითვის ხელმისაწვდომი არ არის.

"ჩვენი წესებისა და პირობების გათვალისწინებით, აღარ შეგვიძლია, შემოგთავაზოთ მომსახურება და ვაუქმებთ თქვენს ანგარიშს" — ნათქვამია eToro-ის ადმინისტრაციის მხრიდან ქართველი მომხმარებლებისთვის გაგზავნილ წერილში.

ელექტრონულ შეტყობინებაში წერია, რომ მომხმარებლებს წერილის მიღებიდან 72 საათი ეძლევათ, რათა ყველა პოზიცია დახურონ. ამასთან, წერილში მითითებულია, რომ არსებული ბალანსი მათ მიერ მითითებულ ანგარიშებზე დაუბრუნდებათ.

eToro საინვესტიციო, საბროკერო კომპანიაა, რომელსაც მსოფლიოს მასშტაბით 10 ოფისი აქვს. მათ შორის, აშშ-ში, დიდ ბრიტანეთში, ისრაელში, კვიპროსსა და ავსტრალიაში.