ბრიტანეთში კაცი მას შემდეგ დააკავეს, რაც მის გვერდით მყოფმა ქალმა პოლიციის ცხელ ხაზზე დარეკა და პიცის შეკვეთა მოითხოვა. იორკშირის პოლიციის ოპერატორმა ქალს უთხრა, რომ თუ ის გასაჭირში იყო, უბრალოდ სიტყვა "დიახ" ეთქვა. ქალმა ოპერატორს "დიახ" უპასუხა და ასე გააგებინა პოლიციას, რომ გასაჭირში იყო. ოპერატორმა დაადგინა, რომ ქალი ავტობუსში იმყოფებოდა, რომელიც იორკის ტერიტორიაზე გაჩერდა.

პოლიციის განცხადებით, 40 წლის კაცი სწორედ ამ ზარის საფუძველზე დააკავეს. ზარის მიღებისას ოპერატორმა ქალს ისეთი კითხვა დაუსვა, რომელზეც მხოლოდ "დიახ" ან "არა" უნდა ეპასუხა, რათა მის გვერდით მყოფი კაცი ვერაფერს მიმხვდარიყო, რაც წარმატებით განხორციელდა.

ზარის შედეგად პოლიციამ დაადგინა, რომ ქალს საფრთხე ემუქრებოდა ავტობუსში მასთან ერთად მყოფი კაცისგან. ოპერატორმა ქალს სთხოვა, რომ ტელეფონი ჩართულ მდგომარეობაში დაეტოვებინა. შედეგად, ავტობუსის გადაადგილების მარშრუტი და მდებარეობა სწორედ ასე დაადგინეს.

"ვიცი, რომ "პიცის შეკვეთის" შესახებ ზარს სხვა ქვეყნებში ხშირად მიმართავენ, თუმცა ასეთი ზარი ჩრდილოეთ იორკშირში ჯერ არ მახსოვს. ოპერაციაში ჩართულმა ყველა ადამიანმა წარმატებით იმუშავა და დაუცველი ქალის დახმარება დროულად შევძელით", — განაცხადა ადგილობრივმა პოლიციელმა.