ტყუპი უისლები — ფრედი და ჯორჯი — პოტერიადის ყველაზე დასამახსოვრებელ გმირებს შორის არიან. ზოგიერთმა შეიძლება იფიქროს კიდეც, რომ ისინი ამბავში მეორეხარისხოვან პერსონაჟებს წარმოადგენენ, თუმცა, თუ მათ ნამოქმედარს გავითვალისწინებთ, განსაკუთრებით, ჰოგვორტში სწავლის ბოლო წლებში და შემდგომ, მივხვდებით, რომ ისტორიის საკვანძო მომენტებში მათ დიდი როლი ითამაშეს. ამის მიუხედავად, ნაწარმოებში უისლების შესახებ ისეთი დეტალებიცაა მოცემული, რომლებიც შეიძლება არ გახსოვდეთ.

სტატია შეიცავს სპოილერების ჰარი პოტერის წიგნებიდან და ფილმებიდან.

1. ტყუპებს სახელები, სავარაუდოდ, ბიძების პატივსაცემად დაარქვეს

ჯადოქრების სამყაროს პირველ ომში მოლი უისლის (პრიუეტის) ორი ძმა მონაწილეობდა, რომელთაც ფაბიენი და გიდეონი ერქვათ. წიგნებში მათ არ შევხვედრილვართ, თუმცა, ვიცით, რომ ორივე მათგანი ვოლდემორის აღზევებას შეეწირა. ამასთან, ძმები პრიუეტები ფენიქსის ორდენის თავდაპირველ შემადგენლობაში შედიოდნენ და ალასტორ მუდის თუ დავუჯერებთ, ნამდვილი გმირებივით იბრძოდნენ. მოლი ძმებს ხშირად არ ახსენებდა, მაგრამ აშკარაა, რომ მისთვის ისინი დიდი დანაკლისია; მან ფაბიენის საათი ჰარის დაბადების დღეზეც კი აჩუქა. ამიტომ, დიდად სავარაუდოა, რომ ფრედისა და ჯორჯის სახელების ინიციალები (F და G) შემთხვევითი არაა.

2. მათ სახელები ისტორიული ალუზიაცაა

ფრედი და ჯორჯი მხოლოდ წინაპრების პატივსაცემად როდი მონათლეს. სარწმუნო პარალელების გავლება შეიძლება ისტორიულ ფიგურებთანაც; მე-18 საუკუნის მიწურულსა და მე-19 საუკუნის დასაწყისში ბრიტანეთს მეფე ჯორჯ III მართავდა. ტახტი ჯორჯს იმიტომ ერგო, რომ მისი ძმა, უელსის პრინცი ფრედრიკი, გამეფებამდე დაიღუპა. ეს მართლაც შეიძლება დამთხვევად ჩაგვეთვალა, მაგრამ საინტერესოა, რომ მეფე ჯორჯს ერთი ყურით არ ესმოდა — ჯორჯ უისლიმ კი ასევე დაკარგა სმენა ცალ ყურში "შვიდი პოტერის" ბრძოლის დროს.

3. ტყუპებმა თავიანთი წარმოებული პროდუქტი პირველად დადლიზე გამოსცადეს

ფენიქსის ორდენში უისლებმა სამომავლო გეგმის — ოინების მაღაზიის შექმნის — განხორციელება დაიწყეს. სანამ მაღაზიას საბოლოოდ გახსნიდნენ, სამი ჯადოქრის ტურნირში ჰარის მოგებული თანხის დახმარებით ახალი პროდუქტების შექმნა და მათი გამოცდა დაიწყეს. თუმცა, რეალურად, ყველაფერი უფრო ადრე დაიწყო — ცეცხლოვანი თასის ფილმის ამოჭრილ სცენაში, სადაც ჰარის უისლები ქვიდიჩის მსოფლიო თასზე წასაყვანად პრივიტ დრაივზე სტუმრობენ, ფრედი "შემთხვევით" აგდებს ენის გამადიდებელ ტოფის, რომელსაც დადლი იღებს და ჭამს. მისი ენა კი, რა თქმა უნდა, მაშინვე იწყებს ზრდას.

4. ოინების მაღაზიის მისამართიც ერთგვარი შიფრია

უისლებისა არ იყოს, დაშიფრული მინიშნებები როულინგსაც ძალიან უყვარს. ამის ერთ-ერთი მაგალითი უისლების ოინების მაღაზიის მისამართია — ის მრუდე ქუჩის 93-ში მდებარეობს. 9 და 3, ცალ-ცალკე აღებული, ჯამში 12-ს ქმნის — რიცხვს, რომელსაც პოტერიადაში განსაკუთრებული ადგილი უჭირავს; ფენიქსის ორდენის საიდუმლო მისამართი გრიმოს მოედანი 12-ია, დამბლდორმა დრაკონის სისხლის გამოყენების 12 გზა აღმოაჩინა, ჰოგვორტსის საბჭო 12 პროფესორს მოიცავს, სირიუსმა აზკაბანში 12 წელი გაატარა...

5. დეიდა მიურიელმა ისინი თავისი ანდერძიდან ამოწერა

ალბათ გახსოვთ მდიდარი დეიდა მიურიელი, რომელმაც ქორწილისთვის ფლერს თავისი დიადემაც ათხოვა, მაგრამ მერე მთელი დრო მხოლოდ წუწუნს უნდებოდა. წინათ კი, ფრედმა და ჯორჯმა, როგორც ჩანს, ისე გაანაწყენეს თავიანთი ნათესავი, რომ მან ისინი ანდერძიდანაც კი ამოწერა. მიზეზი ისაა, რომ უისლების ოჯახში ერთ-ერთ შობას სტუმრობისას ტყუპებმა მიურიელის სკამის ქვეშ ნეხვბომბი შეაგდეს. დეიდა მიურიელი უისლებთან აღარასდროს დაბრუნებულა, თუმცა, ამას დიდად არც არავინ განიცდიდა. ის კი არა, ფრედის და ჯორჯის ეს ოინი შეიძლება მისის უისლის წახალისებულიც კი ყოფილიყო.

6. რონს რომ არაქნოფობია აქვს, ეს სწორედ ტყუპების დამსახურებაა

ობობებისადმი რონის შიში პერსონაჟის ერთ-ერთი ყველაზე დასამახსოვრებელი მახასიათებელია. თუმცა, მას ყოველთვის როდი ჰქონდა არაქნოფობია. საიდუმლო ოთახში იგი მოკლედ იხსენებს, ბავშვობაში როგორ გადაუქციეს მასზე გაბრაზებულმა ფრედმა და ჯორჯმა სათამაშო დათუნია უზარმაზარ ობობად. პატარა რონზე, რომელმაც თავისი საყვარელი სათამაშო რვაფეხიან და უზარმაზართვალებიან არსებად გადაქცეული ნახა, ამან იმხელა გავლენა მოახდინა, რომ ობობების შიში მთელი ცხოვრება გაჰყვა. საინტერესო აქ ერთი დეტალია — ტყუპები ამ დროს იმდენად პატარები იყვნენ, რომ ჯერ ჰოგვორტსშიც კი არ სწავლობდნენ, თუმცა, ტრანსფიგურაციის რთული ოპერაცია მაინც წარმატებით ჩაატარეს. ეს დეტალი ან როულინგს გამორჩა, ან (უფრო სავარაუდოდ) იმის მისანიშნებლად დატოვა, თუ რამდენად ნიჭიერები იყვნენ ფრედი და ჯორჯი.

7. ტყუპები სულაც არ ყოფილან ოროსნები

აკი ვახსენეთ კიდეც, რომ ფრედს და ჯორჯს ნიჭიერება არ აკლდათ. თუმცა, ჰოგვორტსში სწავლით მაინცდამაინც არ გამოირჩეოდნენ. იმის მიუხედავად, რომ ბუა-ს გამოცდებიც ძლივს ჩააბარეს და შემდეგ სკოლიდან გაირიცხნენ, ტყუპები მაინც იმდენად ნიჭიერები გამოდგნენ, რომ საკუთარი შელოცვებიც კი გამოიგონეს. ამასთან შექმნეს ისეთი პროდუქტები, მათ შორის, სიყვარულის ელექსირი, რომ მათით ჰერმიონიც კი აღფრთოვანდა.

8. უჩინმაჩინის კარადის აღმოჩენაში მალფოის შემთხვევით ფრედი და ჯორჯი დაეხმარნენ

უჩინმაჩინის კარადა პოტერიადის დასკვნით ნაწილებში საკვანძო როლს ასრულებს, თუმცა, როულინგის მიერ ზედმიწევნით დაგეგმილ საგაში ეს ჯადოსნური ავეჯი პირველად ნახევარპრინცში არ უხსენებიათ. საიდუმლო ოთახში ჰარი ბორგინ ენ ბერკინსის მაღაზიის უჩინმაჩინის კარადაში იმალება. ფენიქსის ორდენში კი ტყუპმა უისლებმა სლიზერინელი მონტეგიუ ჰოგვორტსში მდგარ სწორედ ასეთივე კარადაში ჩაკეტეს. თუმცა, ვერ მიხვდნენ, ამით რა შეცდომა დაუშვეს — მონტეგიუმ გაქცევა აპარაციით სცადა, მაგრამ გააცნობიერა, რომ ორ ადგილს შორის იყო გამომწყვდეული. მოგვიანებით, ამბავს დრაკო მალფოისაც მოუყვა, ამ უკანასკნელმა კი დაასკვნა, რომ ძველმანების მაღაზიასა და ჰოგვორტსში მდებარე კარადები ერთმანეთთან იყო დაკავშირებული. შემდგომში, მალფოიმ ეს სკოლაში სიკვდილის მხვრელების შემოსაყვანად გამოიყენა.