საქართველოს პარლამენტის თავდაცვისა და უშიშროების კომიტეტის თავჯდომარე ირაკლი სესიაშვილი On.ge-სთან საუბარში აცხადებს, რომ გირჩის ინიციატივა, რომელიც წვევამდელებს სამხედრო სამსახურის გადავადებაში ეხმარება, სასამართლომ უნდა განიხილოს, რადგან, მისი თქმით, ეს იდეა გაუმართლებელია:

"მე არ მითქვამს, რომ ხელისუფლება აპირებს ამას [საკონსტიტუციო სასამართლოში უჩივლოს გირჩს], ჩემი აზრით, რაღაც ფორმა უნდა მოძებნოს, რომლის ფარგლებშიც ამ საქმის სასამართლოში განხილვა მოხდება, არ ვიცი საკონსტიტუციო იქნება თუ სხვა. საქალაქო ვერ იქნება. არ ვიცი რა ფორმით იქნება, მაგრამ ფაქტია, რომ საჭიროებს გარკვევას. მე არსად არ მითქვამს, რომ ჩემი სახელით ვაპირებ ჩივილს, უნდა ვიმსჯელო არასამთავრობო სექტორთან და ექსპერტებთან ჯერ. გირჩი არც მალავს, რომ ხელოვნურად ქმნის ვითომდა რელიგიურ ორგანიზაციას, რეალურად ეს არის საშუალება იმის, რომ მოქალაქეებმა თავი დააღწიონ კონსტიტუციურ ვალდებულებას, რაც, რა თქმა უნდა, არის აბსოლუტურად არასწორი და გაუმართლებელი".

გირჩის წევრებმა დააფუძნეს რელიგიური ორგანიზაცია, რომელიც სასულიერო პირებს აკურთხებს და შესაბამის ცნობასაც გასცემს. სასულიერო წოდების მქონე ახალგაზრდები კი შესაბამისი უწყებებისგან სავალდებულო სამხედრო სამსახურის გადავადებას ითხოვენ და მიზანსაც აღწევენ, რადგან კანონში არსებული ჩანაწერი მათ ამის საშუალებას აძლევს.