ზოგიერთ ქვეყანაში Facebook-ისა და Instagram-ის მომხმარებლებს რუსი ჯარისკაცების შესახებ სიძულვილის ენით შეუძლიათ ილაპარაკონ, თუ საკითხი უკრაინაში შეჭრას ეხება. ეს Meta-ს დროებითი ცვლილებაა, რომელიც კომპანიამ სიძულვილის ენის პოლიტიკაში შეიტანა.

Meta ზოგიერთი ქვეყნის მომხმარებლებს ნებას აძლევს, რომ ვლადიმერ პუტინსა და ბელარუსის პრეზიდენტს, ალექსანდრე ლუკაშენკოს, სიკვდილი უსურვონ და ასეთი პოსტები დროებით აღარ დაიბლოკება.

"რუსეთის უკრაინაში შეჭრის გამო ჩვენ დროებით ისეთ გამოხატვის ფორმებს დავუშვებთ, რომლებიც ჩვენს პოლიტიკას არღვევს. მაგალითად, "სიკვდილი რუს დამპყრობლებს" აღარ დაიბლოკება სიძულვილის ენის გამო. ამასთანავე, რუსი მშვიდობიანი მოქალაქეების მიმართ ძალადობრივ მოწოდებებს ისევ დავბლოკავთ", — ვკითხულობთ Meta-ს განცხადებაში.

ფოტო: Reddit

ლიდერების სიკვდილის შესახებ განცხადებები დაშვებული იქნება იმ შემთხვევაში, თუ პოსტში ადგილმდებარეობა ან მეთოდები არ იქნება აღწერილი. მაგალითად, პოსტი არ უნდა შეიცავდეს ინფორმაციას, თუ როგორ და როდის აპირებენ პუტინის მოკვლას.

Meta იმ ქვეყნების სიასაც აქვეყნებს, რომლებსაც ეს ცვლილება შეეხება. ეს ქვეყნებია: სომხეთი, აზერბაიჯანი, ესტონეთი, საქართველო, უნგრეთი, ლატვია, ლიეტუვა, პოლონეთი, რუმინეთი, რუსეთი, სლოვაკეთი და უკრაინა.

ამ გადაწყვეტილების საპასუხოდ, რუსეთის ფედერაციის საელჩომ ვაშინგტონში აშშ-ისგან Meta-ს "ექსტრემისტული საქმიანობის აღკვეთა" მოითხოვა.

"Meta-ს აგრესიული და კრიმინალური პოლიტიკა რუსების მიმართ სიძულვილსა და მტრობას აღვივებს, რაც აღმაშფოთებელია. კომპანიის ქმედებები კიდევ ერთხელ ადასტურებს ჩვენ წინააღმდეგ წარმოებულ საინფორმაციო ომს, რომელიც წესების გარეშე მიმდინარეობს. […] ამერიკული ხელისუფლებისგან მოვითხოვთ, აღკვეთოს Meta-ს ექსტრემისტული საქმიანობა და მიიღოს ზომები დამნაშავეებისთვის პასუხისმგებლობის დასაკისრებლად", — ვკითხულობთ საელჩოს განცხადებაში.

შეგახსენებთ, რომ რუსეთმა გასულ კვირას Facebook და Twitter მთელი ქვეყნის მასშტაბით დაბლოკა. მათი თქმით, ეს იმიტომ გააკეთეს, რომ რუსული მედიები მსოფლიოს მასშტაბით იზღუდება.