რუსეთის მხრიდან უკრაინაში შეჭრის ფონზე Brent ტიპის ნავთობის ფასი 8%-ით გაიზარდა და ბარელზე 100 დოლარს გადააჭარბა, რაც 2014 წლის შემდეგ მაქსიმალური მაჩვენებელია.

CNBC-ის ცნობით, რამდენიმე საათის წინ ლონდონში Brent ტიპის ნავთობი ბარელზე 105,11 დოლარად ივაჭრებოდა.

აღსანიშნავია, რომ 4,1%-ით არის გაზრდილი ბუნებრივი აირის ფასი. ამასთან, 3%-ით მოიმატა ოქროს ღირებულებამ, რომელიც, როგორც წესი, უსაფრთხო აქტივად ითვლება.

ნავთობის გაძვირება ჯერ კიდევ მაშინ დაიწყო, როდესაც ვლადიმერ პუტინმა დონეცკის და ლუგანსკის ოლქები "დამოუკიდებელ სახელმწიფოებად" გამოაცხადა. მაშინ Lipow Oil Associates-ის პრეზიდენტი, ენდი ლიპოუ ამბობდა, რომ კრიზისის გაუარესების შემთხვევაში ნავთობის ფასი ბარელზე 110 დოლარამდე შეიძლება გაიზარდოს.

მიმდინარე მოვლენების ფონზე მცირდება რუსული კომპანიების აქციების ღირებულებაც. არსებული ინფორმაციით, მოსკოვის საფონდო ბირჟის ინდექსი (MOEX Russia Index) ბოლო ერთ დღეში 35,66%-ით არის შემცირებული. ბოლო საათების განმავლობაში ამ ინდექსის კიდევ უფრო მასშტაბური კლება ფიქსირდებოდა. წლიურ ჭრილში ინდექსი შემცირებულია 45,91%-ით. რუსული აგრესიის შედეგად დღის განმავლობაში დოლართან მიმართებით რეკორდულად გაუფასურდა რუსული რუბლიც.

პუტინმა უკრაინაში ომი დაიწყო, რომელსაც თავად სპეციალურ "სამხედრო ოპერაციას" უწოდებს. უკრაინული მედიისა და სახელმწიფო სტრუქტურების ინფორმაციით, თავდასხმები ხორციელდება არაერთ ქალაქში და იბომბება დასახლებული პუნქტები, მათ შორის კიევში. უკრაინის პრეზიდენტმა, ვოლოდიმირ ზელენსკიმ სამხედრო მდგომარეობა გამოაცხადა და მოუწოდა ხალხს, არ აჰყვნენ პანიკას.

სიტუაცია მუდმივად იცვლება. ამ ეტაპზე არსებული ინფორმაციით, დანაკარგები არის ორივე მხარეს. მაგალითად, უკრაინული შეიარაღებული ძალების გენერალური შტაბის ინფორმაციით, ქალაქ ხარკოვის შემოვლით გზაზე 4 ტანკი დაიწვა, განადგურდა 6 თვითმფრინავი, 2 ვერტმფრენი და დაიღუპა 50-მდე რუსი სამხედრო. უკრაინის პრეზიდენტის ადმინისტრაციაში აცხადებენ, რომ 24 თებერვლის ღამეს 40-ზე მეტი უკრაინელი სამხედრო პირი დაიღუპა. გარდა ამისა, რუსებმა ხარკოვის ოლქში საცხოვრებელი კორპუსი დაბომბეს, დაიღუპა ერთი არასრულწლოვანი.

უკრაინის თავდაცვის მინისტრმა, ალექსეი რეზნიკოვმა მოუწოდა მოქალაქეებს, ვინც მზადაა და იცის იარაღის გამოყენება, ახლავე შეუერთდეს შეიარაღებულ ძალებს. ზელენსკიმ კი განაცხადა, რომ მისცემენ იარაღს ყველას, ვისაც ქვეყნის დაცვა სურს.

უკრაინამ რუსეთთან დიპლომატიური ურთიერთობა გაწყვიტა. პარტნიორი ქვეყნების უმეტესობამ დაგმო რუსეთის აგრესიული ქმედებები. დაგეგმილია G7-ის, ნატოს და გაეროს საგანგებო სხდომები.

გაიგეთ მეტი:

• რუსეთმა ომი დაიწყო, რა ხდება უკრაინაში — განახლებადი