57 წლის ჩეხი მომღერალი ჰანა ჰორკა 16 იანვარს კორონავირუსით გარდაიცვალა. მისი ოჯახის თქმით, მომღერალს ინფიცირებულებთან კონტაქტი გამიზნულად ჰქონდა, რათა ვირუსი გადაეტანა და კოვიდპასპორტი ვაქცინაციის გარეშე მიეღო.

ოჯახის განცხადებით, შობამდე ჰანას ვაქცინირებულ შვილსა და ქმარს კორონავირუსი დაუდასტურდათ. ჰანამ გადაწყვიტა, კორონავირუსი ოჯახის წევრებთან ერთად გადაეტანა და განგებ დაინფიცირდა. შვილი დედის გადაწყვეტილებას ადგილობრივ ანტივაქსერთა გაერთიანებას აბრალებს.

"მან ვაქცინაციას ჩვენთან ერთად ცხოვრება და ვირუსის გადატანა ამჯობინა...ზუსტად ვიცი, ვინ გადააწყვეტინა ეს. ვწუხვარ, რომ ის საკუთარი ოჯახის მაგივრად უცხო ადამიანებს ენდო", — განაცხადა ჰანას შვილმა.

ჩეხეთში კულტურულ და სპორტულ დაწესებულებებში, რესტორნებსა და ბარებში შესასვლელად ვაქცინაციის ან ვირუსის გადატანის დამამტკიცებელი დოკუმენტის წარდგენაა აუცილებელი. გარდაცვალებამდე 2 დღით ადრე მომღერალი წერდა, რომ მალე სასურველი აქტივობებით კვლავ დაკავდებოდა.

"გადავრჩი. რთული იყო. ამიერიდან თეატრი, საუნა, კონცერტები და ზღვაზე გადაუდებელი მოგზაურობა ჩემთვისაც ხელმისაწვდომი იქნება", — წერდა მომღერალი გარდაცვალებამდე.