ნაციონალური მოძრაობის ერთ-ერთი ლიდერის, თინა ბოკუჩავას განცხადებით, ექსპრეზიდენტი მიხეილ სააკაშვილი არის სუსტად, თუმცა მხნედ. ბოკუჩავას თქმით, მესამე პრეზიდენტი რამდენიმე დღეში ვრცელ წერილს გაასაჯაროვებს, სადაც ბრძოლის გაგრძელების საკუთარ ხედვას წარმოადგენს.

"პრეზიდენტი სააკაშვილი და ჩემთვისაც ეს ცხადი იყო, ფიზიკურად არის სუსტად, მაგრამ ის არის ძალიან მხნედ. ამბობს, რომ იბრძოლებს ბოლომდე და რომ აქედან ის გამოვა მხოლოდ და მხოლოდ გამარჯვებული. ის ასევე ძალიან ღელავს და სოლიდარობას უცხადებს მოშიმშილეებს, რომლებიც შიმშილობენ ერთიანი ნაციონალური მოძრაობის ოფისში. [...] სულ რამდენიმე დღეში გასაჯაროვდება წერილი, რომლითაც ის მიმართავს მოშიმშილეებს, პარტიას და წარმოადგენს საკუთარ ხედვას, თუ როგორ უნდა გავაგრძელოთ ბრძოლა, მაგრამ ის არის ძალიან მხნედ და ამბობს, რომ ამ ბრძოლას მიიყვანს ბოლომდე, გამარჯვებამდე და გამარჯვებული გამოვა", — ამბობს ის.

გვიან ღამით სააკაშვილის ადვოკატებმა გაავრცელეს ინფორმაცია, რომ ექსპრეზიდენტი გორის ჰოსპიტლიდან რუსთავის მე-12 დაწესებულებაში გადაიყვანეს. ოფიციალური განცხადება პენიტენციურმა სამსახურმა ინფორმაციის გავრცელებიდან 9 საათის შემდეგ გაავრცელა და დაადასტურა, რომ სააკაშვილი რუსთავის ციხეშია.

დღეს, 30 დეკემბერს, ექსპრეზიდენტის ადვოკატმა, ნიკა გვარამიამ რუსთავის პენიტენციურ დაწესებულებაში სააკაშვილის მონახულების შემდეგ განაცხადა, რომ სააკაშვილი ძალიან სუსტადაა და ის ყალბი დიაგნოზითაა გამოწერილი. მისივე თქმით, მესამე პრეზიდენტზე ფიზიკური ძალადობა არ განხორციელებულა. გვარამია ამბობს, რომ სააკაშვილს წინააღმდეგობის გაწევა არ შეეძლო, რადგან საძილე მედიკამენტებით იყო გაბრუებული და მაღალი წნევა ჰქონდა.