ინდოელმა ბიზნესმენმა, ანანდ პრეკაშ ჩოკსიმ, 200 მილიონი რუპია ($266 ათასი) დახარჯა, რათა თავისი ცოლისთვის "სიყვარულის მონუმენტად" წოდებული თაჯ-მაჰალის ასლი აეგო. მართალია, ნაგებობა ორიგინალს ზომით სამჯერ ჩამოუვარდება, ის მაინც მარმარილოსგანაა აშენებული.

ასევე ორიგინალის ისტორიისგან განსხვავებით, ჩოკსის ცოლი, 27 წლის მანჯუშა, ცოცხალია და თანაც, ასეთი მასშტაბის სურვილები სულაც არ ჰქონია.

"ჩემს ცოლს მხოლოდ მედიტაციისთვის უნდოდა ცალკე ოთახი. სულიერებაზე ზრუნავს", — აღნიშნავს ჩოკსი, — "ამბობს, რომ გუმბათი სულ სხვა ატმოსფეროს ქმნის და გარემოს დადებითი ენერგიით ავსებს".

ფოტო: AFP

ბიზნესმენის თქმით, ნაგებობის შიდა სივრცე, მედიტაციის ოთახის გარდა, ორ საძინებელსა და ბიბლიოთეკას მოიცავს. მის ასაშენებლად ჩოკსის თავადვე დასჭირდა აგრაში რამდენჯერმე გამგზავრება და ორიგინალისთვის თვალის შევლება, რათა ინტერიერიც მეტ-ნაკლებად იდენტური ყოფილიყო.

"ინტერნეტში განთავსებული ბევრი 3D გამოსახულებაც მოვიშველიეთ, რათა ჩვენებური ვერსია შეგვექმნა", — დასძენს იგი.

სხვათა შორის, მეზობლებსაც და ტურისტებსაც შეუძლიათ, ბიზნესმენის მიწის ნაკვეთზე აშენებულ თაჯ-მაჰალის ასლს ეწვიონ.

"ბევრმა დაიწყო თავისი წინასაქორწილო ფოტოების აქ გადაღება", — ამბობს ჩოკსი, — "მეც არ ვუშლი, რადგან ჩვენს პატარა ქალაქში ყველა ყველას იცნობს, ჩემი სახლი კი მათთვის ღიაა".

ფოტო: Pawan Sharma / Getty Images

ბიზნესმენი ასევე ამატებს, რომ ეს ნაგებობა მხოლოდ თავისი სიყვარულის სიმბოლო არაა.

"დღეს ჩვენს ქვეყანაში ბევრი სიძულვილია. ხალხი რწმენისა და კასტის მიხედვით იყოფა. ეს სახლი კი იმ სიყვარულის სიმბოლოა, რომელიც სოციალური სხვაობებისა და პოლიტიკური ქაოსის მიღმაა".

დელის სამხრეთით, აგრაში მდებარე თაჯ-მაჰალის ორიგინალური ნაგებობა მე-17 საუკუნეში ააგებინა იმპერატორმა შაჰ ჯაჰანმა, როგორც ერთგვარი მავზოლეუმი თავისი ცოლის, მუმთაზისთვის. ეს მონუმენტური ნაგებობა, რომელსაც ნობელიანტმა რაბინდრანათ თაგორმა "დროის ლოყაზე ჩამოგორებული ცრემლი" უწოდა, მსოფლიოს ახალი შვიდი საოცრებიდან ერთ-ერთია.