გირჩი — მეტი თავისუფლების ლიდერი, ზურაბ ჯაფარიძე მისთვის საპარლამენტო მანდატის შეწყვეტას ხუმრობით გამოეხმაურა. პირად ანგარიშზე და ფეისბუქგვერდზე მან პოსტები გამოაქვეყნა: ერთში წერს, რომ შეუძლიათ ისევ "შე *ლეოთი" მიმართონ, მეორეში კი ამბობს, რომ "უბედურების ზარმა" მოულოდნელად ჩამოკრა.

დღეს, პლენარულ სხდომაზე ზურაბ ჯაფარიძეს და მამუკა ხაზარაძეს მანდატი შეუწყვიტეს. ჯაფარიძისთვის უფლებამოსილების ვადამდე შეწყვეტას 79-მა დეპუტატმა დაუჭირა მხარი, წინააღმდეგი არავინ ყოფილა. ჯაფარიძის ნაცვლად პარლამენტში გირჩის "სამეფოს მეფე" ჰერმან საბო შევა.

საპარლამენტო არჩევნების დროს გირჩის სიის პირველი ნომერი ზურაბ ჯაფარიძე იყო, შემდეგ მოდიოდნენ: იაგო ხვიჩია, ვახტანგ მეგრელიშვილი, ალექსანდრე რაქვიაშვილი და ჰერმან საბო. გირჩმა პარლამენტში 4 მანდატი მიიღო, შესაბამისად, საბო საკანონმდებლო ორგანოში ვერ მოხვდა. არჩევნების შემდეგ პარტია ორად გაიყო და ჯაფარიძემ გირჩი – მეტი თავისუფლება შექმნა, თუმცა დეპუტატის სტატუსი გირჩის სიით ჰქონდა მიღებული. რადგან მან საკანონმდებლო უწყება დატოვა, მისი ადგილი გირჩის სიაში მომდევნო პირმა, ჰერმან საბომ მიიღო.