ცენტრალური საარჩევნო კომისიის განცხადებით, ოქმებში დისბალანსის შესახებ ინფორმაცია სინამდვილეს არ შეესაბამება. უწყების განმარტებით, ეს გამოწვეულია იმით, რომ სხვადასხვა უბანზე ხმას აძლევენ მხოლოდ პროპორციულ სიას და არა მაჟორიტარულს. ცესკოში ამბობენ, რომ ვრცელდება კოვიდ და პენიტენციურ დაწესესებულებაში შექმნილი სპეციალური უბნების შემაჯამებელი ოქმები.

"თითქოს, ზოგიერთის აზრით, ამ ოქმებში არის გარკვეული დისბალანსი, რაც, რა თქმა უნდა, არ შეესაბამება სინამდვილეს. იმიტომ, რომ პენიტენციურ დაწესებულებაში პროპორციული სისტემით ჩატარებულ არჩევნებში მონაწილეობას სრულად იღებენ ამომრჩევლები, ხოლო ცალკეულ შემთხვევებში, ისეთი ტიპის ოქმებში, რომელიც ეკუთვნის მაჟორიტარული სისტემით ჩატარებულ არჩევნებს და ასევე, მერის ასარჩევად განკუთვნილ ოქმს, აქ ზოგიერთ ამომრჩეველს, კანონით გათვალისწინებული წესით რა თქმა უნდა, მონაწილეობის მიღების საშუალება არ გააჩნია", — ამბობენ უწყებაში.

ცესკოში წარმოადგინეს მაგალითიც. კერძოდ, #20 რუსთავის საოლქო საარჩევნო კომისიის #86 საუბნო საარჩევნო კომისიაში შედგენილი ოქმები. უწყებაშ დასძენენ, რომ თავადაც ყურადღებით აკვირდებიან ოქმებს და "ნებისმიერი კითხვის ნიშანი, რომელიც შეიძლება დაესვას ოქმებს, იქნება სათანადოდ შესწავლილი და შესაბამისად გამოკვლეული ჩვენ მიერ".

ცენტრალური საარჩევნო კომისიის ვებ-გვერდზე ოქმების გამოქვეყნება დაიწყო. უკვე ატვირთული დოკუმენტების ნაწილში დისბალანსია, კერძოდ, არჩევნებში მისულ ამომრჩეველთა საერთო რაოდენობა არ ემთხვევა კანდიდატებისთვის მიცემული ხმების ჯამს.