მარნეულში, სოფელ ყიზილაჯლოს 48-ე საარჩევნო უბანზე ხმაურია. On.ge-ს ჟურნალისიტის ინფორმაციით, რომელიც ადგილზე მუშაობს, ნაცემია ერთი ადამიანი, რომელიც სასწრაფო სამედიცინო დახმარების ბრიგადით საავადმყოფოში გადაიყვანეს.

ნაციონალური მოძრაობის მარნეულის შტაბის უფროსის, გიორგი მუმლაძის ინფორმაციით, ნაცემი ნაციონალური მოძრაობის აქტივისტია, რომელმაც ერთ-ერთი ამომრჩეველს არ მისცა საშუალება მეორედ შესულიყო საარჩევო უბანზე. მუმლაძის თქმით, ამ ფაქტის გაპროტესტების გამო ენმ-ს აქტივისტს თავს დაესხა ქართული ოცნების მაჟორიტარობის კანდიდატი.

"კარუსელს შეუშალა ხელი და ამაზე გამწარებული ყიზილაჯლოს მაჟორიტარი დეპუტატობის კანდიდატი თავს დაესხა და ფიზიკურად სცემა. გამოვიძახეთ პოლიცია, დაგვიანებით მოვიდა სასწრაფოც.

ეს არის სრული ტერორი — წარმოიდგინეთ ადამიანი იცავს ხმებს და ამ დროს მოდის ზონდერ ჩვეულებრივი, რომელიც ცდილობს, რომ ეს ადამიანი დააშინოს და აქ თავისუფლება მოიპოვოს და რაც უნდათ ის აკეთონ", — განაცხადა გიორგი მუმლაძემ.

ადგილზე იმყოფებოდა ქართული ოცნების მაჟორიტარი დეპუტატი, ზაურ დარგალი, რომელმაც მუმლაძეს პროვოკატორი უწოდა და ამტკიცებდა, რომ არჩევნები მშვიდ გარემოში მიმდინარეობს.

ქართული ოცნებაში აცხადებენ, რომ ინციდენტი თავიდან ბოლომდე გიორგი მუმლაძის მოწყობილი პროვოკაციაა.

"პირადად მუმლაძემ მოაწყო ეს ინციდენტი. ზოგადად, ეგ ადამიანი არის პროვოკატორი. შემჩნეულია არაერთხელ პროვოკაციების მოწყობაში. ამჯერადაც გააკეთა იგივე — შეურაცხყოფა მიაყენა სიტყვიერი და ფიზიკური, მათ შორის, ქართული ოცნების წარმომადგენლებს. აი ეს არის სიმართლე და ჩვენი პოზიცია", — უთხრა On.ge-ს ქართული ოცნების პრესსამსახურის წარმომადგენელმა, გიორგი გრძელიშვილმა.

On.ge დამატებითი დეტალების გასარკვევად დაუკავშირდა შინაგან საქმეთა სამინისტროს. ინფორმაციას უწყებიდან პასუხის მიღებისთანავე მოგაწვდით.