ირვინ უელშის ბესტსელერის, ჩხერკეთელაობის, გაგრძელების მიხედვით სერიალს გადაიღებენ. The Blade Artist-ის სატელევიზიო ადაპტაციის მსახიობი, რობერტ კარლაილი, ინფორმაციას ადასტურებს.

კარლაილმა ნაწარმოების ერთ-ერთი მთავარი პერსონაჟის, ედინბურგელი ბეგბის როლი 1996 წელს გამოსულ კლასიკად ქცეულ ფილმსა და მის გაგრძელებაში, T2: Trainspotting, შეასრულა. ეს უკანასკნელი 2017 წელს გამოვიდა, მას შემდეგ კი მითქმა-მოთქმა დაიწყო, რომ მესამე ფილმიც მზადდებოდა. იდეას თავად უელშიც გულშემატკივრობდა, თუმცა, როგორც ჩანს, მესამე ფილმის დიდ ეკრანზე გამოსვლას პატარა ეკრანისთვის განკუთვნილმა სერიალმა დაასწრო.

"ცოტა ხნის წინ მე და ირვინმა ბევრი ვიმსჯელეთ, ვინ იყვნენ ლონდონში მყოფი შესანიშნავი პროდიუსერები ამისთვის [ჩხერკეთელაობის ისტორიის გასაგრძელებლად].

"როგორც იცით, კიდევ ერთი წიგნია, The Blade Artist, რომელიც მთლიანად ბეგბიზე და მის არანორმალურ ამბავზეა. ყველაფერი ჯერ კიდევ ადრეულ ეტაპზეა, თუმცა, კარგია, რომ საბოლოოდ ეს მაინც მოხდება".

ფოტო: PolyGram Filmed Entertainment

The Blade Artist მეხუთე წიგნია, რომელიც შოტლანდიელმა მწერალმა ჩხერკეთელაობის პერსონაჟების შესახებ შექმნა. მასში ბეგბი სრულიად გარდასახული გვევლინება — ახალი სახელით, ჯიმ ფრენსისით, რომელიც თავის ცოლთან და ორ შვილთან ერთად კალიფორნიაში ცხოვრობს.

"ჩვენ ალბათ ექვსი ერთსაათიანი სატელევიზიო ეპიზოდის შექმნაზე ვფიქრობთ", — ამბობს კარლაილი, — "რაც უნდა იყოს, ჩემთვის ეს მისაღებია და ირვინსაც მოეწონა იდეა. დიდი ისტორიაა — ლოს-ანჯელესიდან ედინბურგამდე და პირიქით. რთული იქნებოდა, ეს ყველაფერი საათნახევარში ჩაგვეტია. მით უმეტეს, თუკი წიგნისეული საფუძვლის შენარჩუნება გსურს".

კარლაილი დასძენს, რომ ამ გადაწყვეტილების მიღებისას მაყურებლების ინტერესებიც გაითვალისწინეს, რომელთაც სერიების ერთიმეორის მიყოლებით ყურება უყვართ.

"გეგმა ასეთია: სავარაუდოდ, მომავალ წელს და ცოტა მერე, იმედია, ისევ დავილაპარაკებთ და ბეგბის დაბრუნებაზე ვისაუბრებთ".