24 მაისს, ნიუ მექსიკოს ქალაქ ალბუკერკეში, სადაც დონალდ ტრამპი თავის მხარდამჭერებს ხვდებოდა, შენობის გარეთ შეკრებილმა მისმა მოწინააღმდეგეებმა პროტესტის ძალადობრივ მეთოდებს მიმართეს, პოლიციას დაუშინეს ქვები, ჩაამსხვრიეს ვიტრინები ახლომდებარე შენობებში.

გარდიანის ინფორმაციით, სოციალურ მედიაში ვრცელდებოდა ინფორმაცია ცრემლსადენი გაზის გამოყენებისა და იარაღის სროლის ხმებზე, მაგრამ პოლიციამ ამ ცნობებს "არაზუსტი" უწოდა.

ძალადობრივ აქციას წინ უძღოდა ვაშინგტონის პრაიმერი, სადაც დონალდ ტრამპმა ხმების 76 პროცენტამდე აიღო, ხოლო ტედ კრუზმა, რომელიც უკვე გამოეთიშა მარათონს, 10,1 პროცენტი.

ესოშიეითიდ პრესის ჟურნალისტი რუზელ კონტრერასი ტვიტერზე წერს, რომ ცრემლსადენი გაზის გაშვებას თავადაც შეესწრო და ტრამპის მოწინააღმდეგეები პოლიციის მიმართ ძალადობას ავლენდნენ.

აშშ-ში საპრეზიდენტო არჩევნები 2016 წლის ნოემბერში იმართება, მანამდე კი ყველა შტატში ტარდება პრაიმერი. ბოლო პრაიმერი ივნისშია დაგეგმილი, სადაც საბოლოოდ გადაწყდება ვინ გახდება როგორც რესპუბლიკური, ისე დემოკრატიული პარტიის პრეზიდენტობის კანდიდატი.