ქართული ოცნება დეპუტატისთვის იმუნიტეტის მოსახსნელად საჭირო ხმების რაოდენობის 50-დან 90-მდე გაზრდას გეგმავს. ამის შესახებ სათანადო კანონპროექტი პარლამენტში უკვე ინიცირებულია.

"კიდევ ერთხელ, აღქმის დონეზეც რომ შეწყდეს ყოველგვარი სპეკულაცია ამა თუ იმ გადაწყვეტილებასთან დაკავშირებით, ვაინიცირებთ ახალ კანონპროექტს დეპუტატისთვის იმუნიტეტის მოსახსნელად კვორუმის გაზრდასთან დაკავშირებით", — განაცხადა საპროცედურო საკითხთა და წესების კომიტეტის თავმჯდომარემ, ირაკლი ქადაგიშვილმა.

დღეს მოქმედი კანონმდებლობით, დეპუტატისთვის იმუნიტეტის მოსახსნელად, მინიმუმ, 50 დეპუტატის ხმაა საჭირო. ინიციტივის თანახმად კი, ამისთვის მაღალი ქვორუმი — სიითი შემადგენლობის 3/5-ის, 90 დეპუტატის თანხმობა იქნება საჭირო.

ქადაგიშვილის თქმით, კანონპროექტი შარლ მიშელის მიდიციაციის პროცესის შედეგად მიღებული დოკუმენტიდან გამომდინარეობს და მის სულისკვეთებას ასახავს.

"ამ ხელშეკრულებაში წერია, რომ, თუ ამის საჭიროებას დაინახავს პარლამენტი, მოხდეს კვორუმის გაზრდა. ჩვენ სწორედ იმ სულისკვეთებიდან გამომდინარე, რომ რაც შეიძლება თანმიმდევრულად და რაც შეიძლება სწრაფად მოხდეს იმპლემენტაცია ყველა იმ დებულებისა, რომელიც შარლ მიშელის დოკუმენტში იქნა შეტანილი, შემოგვაქვს ეს კანონპროექტი", — განაცხადა ქადაგიშვილმა.

პარლამენტში პროექტის საკომიტეტო განხილვა უახლოეს დღეებში დაიწყება.