რუსული ორგანიზაცია, რომელიც ინტერნეტში ინფორმაციაზე წვდომის შეზღუდვაზე მუშაობს, ჩინელ ექსპერტებს შეხვდა.

რუსული უსაფრთხო ინტერნეტის ლიგა და ჩინელი ცენზორები გასულ თვეს, მოსკოვში შეხვდნენ ერთმანეთს. ჩინურ მხარეს ჩინეთის დიდი Firewall-ის შემქმნელი ფენ ბიზინი წარმოადგენდა.

უსაფრთხო ინტერნეტის ლიგა არასამთავრობო ორგანიზაციაა, მაგრამ არსებული ცნობებით, სახელმწიფოს მიერაა კონტროლირებული.

მოსკოვური შეხვედრის შესახებ ფენ ბიზინი ჟურნალ cyber sovereignty-ს ესაუბრა. მისი თქმით, სახელმწიფომ კიბერ და ფიზიკური საზღვრები ერთნაირად უნდა დაიცვას.

ჩინეთის კიბერუსაფრთხოებისა და ინტერნეტ პოლიტიკის ხელმძღვანელი ლუ ვეი ამბობს, რომ ონლაინ თავისუფლება უფლება კი არა პასუხისმგებლობაა. მისი თქმით, ინტერნეტ თავისუფლება შეიძლება ტერორიზმამდე მივიდეს და ამიტომ უნდა შეიზღუდოს.

ლუს თქმით, ის ეთანხმება რუს პოლიტიკოსებს, რომლებიც ამბობენ, რომ დასავლეთი ჩინეთისა და რუსეთის ფედერაციის წინააღმდეგ საინფორმაციო ომს აწარმოებს.

შეხვედრის მიმდინარეობისას, რუსმა და ჩინელმა ოფიციალურმა პირებმა განაცხადეს, რომ გლობალურ ქსელს ამერიკის ბიზნეს ინტერესები აკონტროლებს.

უსაფრთხო ინტერნეტის ლიგის თავმჯდომარე კონსტანტინ მალოფეევი თანამშრომლობს, როგორც რუსეთის ხელისუფლებასთან, ასევე აღმოსავლეთ უკრაინელ სეპარატისტებთან. მისი თქმით, რუსეთმა ჩინეთის პრაქტიკა უნდა გადმოიღოს და ინტერნეტში საკუთარი სუვერენიტეტი დაიცვას.

რუსი ინტერნეტ ექსპერტების თქმით, ქვეყნის მთავრობა გლობალურ ქსელზე კონტროლის გაზრდას წინასაარჩევნოდ გეგმავს.

საპარლამენტო არჩევნები რუსეთის ფედერაციაში 18 სექტემბერს გაიმართება.