შინაგან საქმეთა სამინისტროს ინფორმაციით, დანაშაულებრივი ჯგუფის ხუთმა წევრმა ლილოს ბაზრობის მიმდებარე ტერიტორიიდან პირი საკუთარი მანქანით გაიტაცეს. უწყების ცნობით, დანაშაულის მოტივი ფულის გამოძალვა იყო.

შსს-ს ინფორმაციით, ცენტრალური კრიმინალური პოლიციის დეპარტამენტის და სახელმწიფო უსაფრთხოების სამსახურის კონტრტერორისტული ცენტრის თანამშრომლებმა, დანაშაულებრივი ჯგუფის ხუთივე წევრი: 1960 წელს დაბადებული ზ.კ., 1957 წელს დაბადებული ქ.ო., 1967 წელს დაბადებული გ.ვ., 1970 წელს დაბადებული ნ. გ. და 1968 წელს დაბადებული ო.მ., მომხდარიდან რამდენიმე წუთში, თბილისში დააკავეს.

გამოძიების ინფორმაციით, ბრალდებულებმა, ფულის გამოძალვის მიზნით, 1974 წელს დაბადებული რ.ა. ლილოს ბაზრობის მიმდებარე ტერიტორიაზე იძულებით ჩასვეს მისსავე კუთვნილ ავტომანქანაში და თბილისის ზღვის მიმართულებით გაიტაცეს.

შსს-ს ცნობით, პოლიციამ დაკავებულების პირადი და ავტომანქანის ჩხრეკისას ნაგანის ტიპის არარეგისტრირებული ცეცხლსასროლი იარაღი, საბრძოლო ვაზნები, ერთჯერადი ხელბორკილები, ნიღბები, ცივი იარაღი, თავზე ჩამოსაცმელი ტომარა, ღვედები, წებოვანი ლენტი და დაზარალებულისთვის წართმეული 5600 ლარი ნივთმტკიცებად ამოიღო.

გამოძიება მძევლად ხელში ჩაგდებისა და ცეცხლსასროლი იარაღის და საბრძოლო მასალის მართლსაწინააღმდეგო შეძენა-შენახვა-ტარების ფაქტზე მიმდინარეობს (საქართველოს სსკ-ს 144-ე მუხლის მე-2 ნაწილის ა, ვ ქვეპუნქტებით და სსკ-ს 236-ე მუხლის მე-2 და მე-3 ნაწილებით).