პური შავია თუ შეღებილი, ამის დასაზუსტებლად სპეციალური ლაბორატორიული კვლევაა საჭირო, რასაც საქართველოში არც ერთი სახელმწიფო დაწესებულება არ აკეთებს. ამის შესახებ საუბარია სტუდია მონიტორის მიერ მომზადებულ სიუჟეტში.

როგორც მედიასაშუალებამ გამოიკვლია, წესით, რუხი პური რუხი ფქვილისგან მზადდება. პურის მწარმოებელი ცნობილი ბრენდები ამბობენ, რომ თავად შემოაქვთ რუხი ფქვილი. საქართველოში კი არც ერთი უწყება არ აღწერს, შემოდის თუ არა რუხი ფქვილი. საბაჟოსა და საქსტატში მონიტორს უთხრეს, რომ მისი იმპორტის შესახებ ინფორმაცია არ აქვთ.

სტუდია მონიტორმა ბაზარზე მომუშავე 5 მსხვილ წისქვილკომბინატს ჰკითხა, აწარმოებდნენ თუ არა შავ ფქვილს. მათი უმრავლესობა რუხ ფქვილს არ ამზადებს. კომპანიის ნაწილი ამზადებს მხოლოდ შეკვეთის შემთხვევაში.

თამარ გობეჯიშვილი, რომელიც 8 წელია მომხმარებელთა უფლებებს იცავს, მედიასაშუალებასთან ინტერვიუში ამბობს, რომ მომხმარებლებისთვის ერთ-ერთი ყველაზე მწვავე საკითხი პურის ხარისხია. უფლებადამცველი აღნიშნავს, რომ მომხმარებელთა ინტერესს რუხი, დიეტური და დიაბეტური პურის შესახებ ინფორმაცია წარმოადგენს.

მართალია, სტუდია მონიტორს არ დაუდგენია, კონკრეტულად რომელი ბრენდის რუხი პურია ნამდვილად რუხი ფქვილისგან დამზადებული და რომელი - შეღებილი, თუმცა, გამოიკვლია, რომ ბაზარზე ხელმისაწვდომია სპეციალური საღებავი, რომლითაც შესაძლებელია თეთრი ფქვილის ისე შეღებვა, რომ საბოლოოდ გამოცხვეს რუხი პური. მსგავსი ექსპერიმენტი სტუდია მონიტორმა უკვე ჩაატარა, მათ დაუბრკოლებლად შეიძინეს მსგავსი საღებავი, რომლის გამოყენებითაც, თეთრი ფქვილისგან გამოაცხვეს რუხი პური. აღნიშნული ექსპერიმენტისა და ჟურნალისტური მოკვლევის შესახებ, შეგიძლიათ ნახოთ სტუდია მონიტორის რეპორტაჟი.

პურს რომ გაუკეთდეს წარწერა, "დიაბეტური" და "დიეტური, საჭიროა ჯანდაცვის სამინისტროს ნებართვა. მსგავსი ნებართვა 10 კომპანიას აქვს, თუმცა სამინისტრო შემდეგ არ აკონტროლებს, რამდენად იცავენ რუხი პურის მომზადების წესებს აღნიშნული კომპანიები.

ერთადერთი, ვისაც შეუძლია შემოწმება, პური მართლაც დიეტური, დიაბეტური თუ შეღებილია, სურსათის ეროვნული სააგენტოა. სააგენტოში მონიტორს უთხრეს, რომ ისინი პურს საღებავის შემცველობაზე არ ამოწმებენ. თუმცა ამოწმებენ, პური მოხმარებისთვის უვნებელია თუ არა.

მომხმარებელთა უფლებების დამცველები ამბობენ, რომ სრულფასოვანი კონტროლისთვის პურში საღებავის შემცველობის კვლევაა საჭირო, რაც ამჟამად არ ხდება. რუხ პურს ვიყიდით მაღაზიაში თუ რუხად შეღებილ პურს, დღეს მხოლოდ მეწარმეების კეთილსინდისიერებაზეა დამოკიდებული.