მელანია ტრამპის ყოფილი მრჩეველი იტყობინება, რომ მას მოეპოვება ჩანაწერი, სადაც აშშ-ის პირველი ლედი დონალდ ტრამპსა და მის უფროს შვილებზე დამცინავ კომენტარებს აკეთებს.

სტეფანი უინსტონ უოლკოფი, მელანია ტრამპის ყოფილი მეგობარი და მრჩეველი, სექტემბერში მემუარული წიგნის გამოშვებას აპირებს, რომლის სახელიცაა მელანია და მე: პირველ ლედისთან ჩემი მეგობრობის დაწყება და დასრულება. ამ კვირას ჟურნალისტ იაშარ ალის ცნობით, უოლკოფს "ჩანაწერი აქვს გაკეთებული, სადაც მელანია პრეზიდენტსა და მის უფროს შვილებზე დამცინავ კომენტარებს აკეთებს", ამ ყველაფერზე კი საზოგადოება სწორედ წიგნიდან შეიტყობს.

თუმცაღა ალის სტატიაში არც სამხილია წარმოდგენილი და არც კონკრეტული ცნობა. იგი ამბობს, რომ მელანიას მიერ "უხეში კომენტარებია ნათქვამი ივანკა ტრამპის მიმართ" და რეალურად, როგორც ჟურნალისტი დასძენს, დამცინავი კომენტარების უმეტესობა სწორედ "ივანკა ტრამპს მიემართება". ცნობის თანახმად, ჯერჯერობით, უცნობია, თავად წიგნში მოყვანილი ისტორიების დასტურად თუ გამოქვეყნდება აუდიოჩანაწერები.

მელანია ტრამპი, დონალდ ტრამპი და პირველი ლედის ყოფილი მეგობარი და მრჩეველი — სტეფანი უინსტონ უოლკოფი.

ფოტო: Billy Farrell / BFA / Shutterstock

უოლკოფის წიგნი ერთადერთი მემუარული ხასიათის ნაწარმოები როდია, რომელიც პრეზიდენტ ტრამპსა და მის გარემოცვას ეხება. ივლისში პრეზიდენტის ძმისშვილმა, მერი ტრამპმა, წიგნი გამოსცა, რომელმაც გაყიდვების რეკორდიც კი მოხსნა. გასულ კვირას The Washington Post იტყობინებოდა, რომ მერი ტრამპს პრეზიდენტის დასთან, მერიენ ტრამპ ბერისთან, საუბრის აუდიოჩანაწერი ჰქონდა, სადაც იგი ამბობს, რომ დონალდს "პრინციპები არ აქვს" და "მას არ უნდა ენდო".

უოლკოფის წიგნი, რომელიც გამომცემლის შეფასებით "ემოციური და გულწრფელი მემუარია", პირველი სექტემბრიდან გამოჩნდება მაღაზიის წიგნის თაროებზე.