საქართველოს პრეზიდენტმა, გიორგი მარგველაშვილმა დონალდ ტრამპს გამარჯვება მიულოცა და მასთან თანამშრომლობის გაგრძელების სურვილი გამოთქვა:

"პატივცემულო, ბატონო პრეზიდენტო, მოუთმენლად და დიდი იმედით ველი ჩვენს შემდგომ თანამშრომლობას, რომელიც კიდევ უფრო გააძლიერებს ჩვენი ქვეყნების სტრატეგიული პარტნიორობას. დარწმუნებული ვარ, რომ ერთობლივი ძალისხმევით ქართულ-ამერიკული მრავალწლიანი მეგობრობა და ძლიერი ურთიერთკავშირი კიდევ უფრო გაღრმავდება და განმტკიცდება ჩვენი ქვეყნების საკეთილდღეოდ."

პრეზიდენტის აზრით, ამერიკის შეერთებულ შტატებს განსაკუთრებული როლი აქვს საქართველოს განვითარებაში:

"გამუდმებით, ჩემი ქვეყნის წინსვლისა და განვითარების ყოველ ეტაპზე, ჩვენ ვგრძნობთ ამერიკელი ხალხისა და მის მთავრობის უზარმაზარ მხარდაჭერასა და თანადგომას. მსურს მადლობა გადაგიხადოთ საქართველოს სახელმწიფოებრიობის, დემოკრატიული განვითარების, სუვერენიტეტისა და ტერიტორიული მთლიანობის, ასევე ევროპული და ევროატლანტიკური სწრაფვის ურყევ მხარდაჭერაში აშშ-ს განსაკუთრებული როლისათვის, რასაც ქართველი ხალხი უაღრესად აფასებს."

ბოლო მონაცემებით, ტრამპა საჭირო 270 ხმაზე მეტი, 274 ხმა მოიპოვა, ჰილარი კლინტონმა კი - 215. შესაბამისად თეთრი სახლის ოვალურ კაბინეტს სწორედ ტრამპი დაიკავებს.