თბილისის საქალაქო სასამართლომ საქმის განხილვის დასრულებამდე ანას ბაღთან კორპუსის მშენებლობის შეჩერებაზე განჩინება გამოსცა. ამის შესახებ ინფორმაცია On.ge-ს ადვოკატმა მუხრან ღურწკაიამ განუცხადა, რომელიც მოქალაქეთა ინტერესებს იცავს.

ანას ბაღის დასაცავად მოსახლეობა აქციას რამდენიმე თვეა მართავს. მათ უნდათ, რომ 10- სართულიანი კორპუსი არ აშენდეს, რადგან პარკის არსებობას საფრთხის წინაშე აყენებს.

22 თებერვალს ადგილობრივი მოსახლეობამ, რომელიც რამდენიმე თვეა ანას ბაღის გადასარჩენად იბრძვის, აქტივისტებთან ერთად სკვერი პარტიზანულად გააშენეს. მათ ასფალტის საფარი დაამტვრიეს და მცენარეები დარგეს. მეორე დღეს დილით კი კორპუსის მშენებელმა კომპანიამ პარტიზანულად მოწყობილი დასასვენებელი სივრცე მოშალა. მაშინ, როცა მოქალაქეები ანას ბაღის დაცვას ცდილობენ, მერი ირწმუნება, რომ იქ კორპუსი არ აშენდება.