ტელეკომპანია რუსთავი 2-ის ყოფილი დირექტორი, ნიკა გვარამია მიიჩნევს, რომ პროკურატურამ ის დაამცირა და ღირსება შეულახა, როცა ბრიფინგზე მისი ბინების ეპიზოდზე ისაუბრა. ამ საკითხზე გვარამიამ მოსამართლის კითხვაზე პასუხის გაცემის დროს ისაუბრა. მოსამართლე დაინტერესდა ჰქონდა თუ არა ადგილი სამათალდამცავების მხრიდან წამებას ან ღირსებისშემლახველ მოპყრობას ან შეურაცხყოფას.

"პროკურორის სკამზე მატყუარა ზის", — ამ სიტყვებით მიმართა გვარამიამ მოსამართლეს.

პროკურატურა განმარტავს, რომ ამ ეპიზოდზე გამოძიება გრძელდება და წაყენებული ბრალი ამ დეტალს არ მოიცავს.

"ის კვალიფიციური იურისტია და უნდა ფლობდეს ინფორმაციას, რას გულისხმობს წამება და დამცირება, მან ეს განცხადება იმიტომ გააკეთა, რომ ზემოქმედება მოახდინოს მასებზე. ბრიფინგზე ორი ინფორმაცია გავრცელდა ერთი იყო დადგენილება თუ რაში ედებოდა ბრალი გვარამიას და ამის შემდგომ საზოგადებას ეცნობა, რომ ამ დადგენილებით გამოძიება არ დასრულებულა და არის სხვა საკითხებიც, მათ შორის ქონების გადაფორმეის საკითხი არის ინტერესის საგანი", — განაცხადა სხდომაზე პროკურორმა ზვიად გუბელაძემ.

გუშინ, 9 აგვისტოს პროკურატურამ ნიკა გვარამიას ბრალი წაუყენა. მას არხის დირექტორად მუშაობის დროს საზიანო გადაწყვეტილების მიღებას ედავებიან. ბრალის წაყენების დროს პროკურორმა ისაუბრა "გვარამიას ბინებზეც".

ფრაგმენტი პროკურატურის განცხადებიდან "გვარამიას ბინებთან" დაკავშირებით: დადგენილია, რომ კომპანიამ 2016 წლის დეკემბრის ნასყიდობის ხელშეკრულებით, (შპს ინტერ მედია პლიუსს ამ ხელშეკრულების გაფორმებისას წარმოადგენდა რუსთავი 2-ის იურისტი დიმიტრი საძაგლიშვილი) საკუთრებაში მიიღო, ქ.თბილისში, ვაკის ერთ-ერთ პრესტიჟულ უბანში მდებარე 565 226 ლარის ღირებულების 2 საცხოვრებელი ბინა, საერთო ფართით, 240 მ² 2017 წლის მარტში, ორივე ბინა საკუთრებაში გადაეცა რუსთავის 2-ის იმდროინდელ გენერალურ დირექტორს ნიკა გვარამიას, რომელმაც იმავე წლის ივლისში და სექტემბერში საცხოვრებელი ბინების რეალიზაცია მოახდინა — საერთო ჯამში 602 521 ლარად.

გვარამიას წინააღმდეგ 16 ივლისს რუსთავი 2-ის 9-პროცენტიანი წილის ყოფილმა მფლობელმა, ნინო ნიჟარაძემ პროკურატურაში საჩივარი შეიტანა. ნიჟარაძე ტელეკომპანიის დირექტორის მიერ უფლებამოსილების ბოროტად გამოყენების მუხლით გამოძიების დაწყებას ითხოვდა. ისვე აცხადებდა, რომ გვარამიას გადაწყვეტილებებმა არხს ფინანსური ზიანი მიაყენა. სწორედ ამ საქმეზე აპირებს პროკურატურა ტელევიზიის ყოფილი დირექტორისთვის ბრალის წაყენებას.