საარჩევნო ბლოკის პაატა ბურჭულაძე - სახელმწიფო ხალხისთვის ლიდერი პაატა ბურჭულაძე მიიჩნევს, რომ სასამართლოში ჩივილი "ვაჟკაცური საქმე" არ არის. ამის შესახებ მან ტელეკომპანია პირველის ეთერში განაცხადა:

"არ მესმის ამ ადამიანს [ბიძინა ივანიშვილს] ყველაფერი ეპატიება ამ ქვეყანაზე? რაც მოუვა თავში, რაც მოუვა ენაზე უნდა ილაპარაკოს. მე ასეთი მოპყრობა მისგან არ მომწონს. ერთხელ გამეცინა, მეორედ გამეცინა, იუმორით ვუპასუხე. ცოტა მიხედოს თავის საუბარს და ცოტა კულტურულად მოიქცეს. ეგ დაუსჯელად არ უნდა დარჩეს. ბოდიში უნდა მოიხადოს. თუ არ მოიხდის ეს იმას ნიშნავს, რომ ტყუის. მე სასამართლოში ამის მჩივლელი არ ვარ. ეს არ არის ჩემი მიზანი. მე ასი ათასობით ადამიანი იმედის თვალით მიყურებს. უცებ გამოდის და იძახის რომ მე მას ფული მოვთხოვე. ან დაამტკიცოს ან ბოდიში მოიხადოს. ეს აუცილებელია.

მე არასდროს სასამართლოსთვის არასდროს მიმიმართავს. ეს არ არის ვაჟკაცური საქმე, რომ სასამართლოში ვიჩივლო. მე ვარ თბილისში გაზრდილი, განსხვავებით ბატონი ბიძინასგან და მე ცოტა სხვანაირად ვიცი პასუხის მოთხოვნა. სასამართლოში ჩივილი ამის თაობაზე, ჩემი აზრით, არ იქნება თბილისურად ლამაზი."

ივანიშვილმა, 12 სექტემბერს, ტელეკომპანია GDS-ის ეთერში, იმერეთის რეგიონის ჟურნალისტებთან შეხვედრისას განაცხადა, რომ ბურჭულაძესთან პარტნიორობის მცდელობა ჰქონდა:

"მე სამი წელია ეს კაცი არ მინახავს. ნაწყენი ვიყავი იმიტომ, რომ თავის დროზე როცა ვთხოვე გვერდით დაგვიდექი, უამრავი ფული მოითხოვა და შეურაცხყოფილი იყო, უარი ვუთხარი."