ამერიკის დემოკრატიული პარტიის პრეზიდენტობის კანდიდატის ექიმის თქით, ჰილარი კლინტონს ფილტვების ანთება აქვს და ის მკურნალობას გადის. ექიმმა დიაგნოზი მას შემდეგ გაავრცელა, რაც კლინტონმა 11 სექტემბრისთვის მიძღვნილი ცერემონია მოულოდნელად დატოვა.

BBC-ის ცნობით, ექიმმა ლიზა ბარდაკმა განაცხადა, რომ ჰილარი კლინტონს პნევმონიის დიაგნოზი პარასკევს დაუსვეს და ის ანტიბიოტიკებს იღებს, ცერემონიაზე მომხდარი ინციდენტი კი პრეზიდენტობის კანდიდატის დეჰიდრატაციამ გამოიწვია.

ექიმის განცხადებით, დახმარების აღმოჩენის შემდეგ პრეზიდენტობის კანდიდატი თავს კარგად გრძნობს, თუმცა კლინტონის კამპანიის წარმომადგენლებმა განაცხადეს, რომ მას ორშაბათს და სამშაბათს კალიფორნიაში დაგეგმილი შეხვედრების გაუქმება მოუწია.

დღის ბოლოს ჰილარი ნიუ-იორკში მისი შვილის სახლიდან გამოვიდა, ფოტოგრაფებს მიესალმა და უთხრა, რომ თავს მშვენივრად გრძნობდა.

ჰილარი კლინტონი ნიუ-იორკში მისი შვილის სახლიდან გამოდის და ფოტოგრაფებს ესალმება. 11 სექტემბერი, 2016 წელი.

ფოტო: AP