საპატრიარქოს სამუშაო ჯგუფის წარმომადგენლები მოითხოვენ, ჩანასახს მუცლად მყოფი ბავშვის სტატუსი მიენიჭოს. ამის შესახებ ვიდეომასალა რადიო თავისუფლებამ გაავრცელა. სამების საკათედრო ტაძრის ახალგაზრდულ ცენტრში მეორედ შეიკრიბნენ, ამჯერად, აბორტზე სასაუბროდ. შეხვედრას დაესწრნენ ქართული ოცნების დეპუტატები, სოფო კილაძე და მარიამ ჯაში.

"მთელი საზოგადოება, მათ შორის ავტორიტეტული უფლებადამცველებიც კი დუმან ბავშვის უფლებებზე. შესაბამისად, ეკლესია ამწვავებს, ააქტიურებს, განგაშის ზარებს ტეხავს იმასთან დაკავშირებით, რომ ასეთ მდგომარეობაში ყოფნა არ შეიძლება. უნდა იქნეს აღიარებული ჩანასახის, როგორც მუცლად მყოფი ბავშვის სტატუსი", — განაცხადა სამუშაო ჯგუფის წარმომადგენელმა, მამა გიორგი ფირცხელანმა.

სამებაში სამუშაო ჯგუფის შეხვედრა პირველად ოჯახში ძალადობის შემცირების თემაზე გაიმართა. მაშინ მამა გიორგი ფირცხელანმა ინიციატივა გააჟღერა, რომ ოჯახში ძალადობის საკითხებში ეკლესიის, როგორც მედიატორის ფუნქცია უნდა გაიზარდოს.