ზვიად ქორიძემ შეწყალების კომისიის თავმჯდომარის თანამდებობა დატოვა. ამასთანავე, კომისიიდან წამოვიდა საერთაშორისო გამჭვირვალობა — საქართველოს ხელმძღვანელი, ეკა გიგაური.

როგორც ზვიად ქორიძემ On.ge-ს უთხრა, თანამდებობის დატოვების შესახებ განცხადება 31 დეკემბერს დაწერა. მისივე თქმით, კომისიიდან თავისი სურვილით წამოვიდა და სხვა წევრებსაც სურდათ მისი დატოვება.

"თუ [სალომე] ზურაბიშვილი შექმნის ახალ კომისიას სხვა შემადგენლობით, ძველი ავტომატურად გაუქმებულად ითვლება. რაკი არ შექმნა ეს კომისია, მე საჭიროდ ჩავთვალე, რომ დამეტოვებინა. ორი კვირის განმავლობაში მეგონა, რომ ის შექმნიდა ახალ კომისიას", — აღნიშნა ქორიძემ.

ეკა გიგაურის თქმით, ხუთწლიანი მუშაობის შემდეგ კომისიის დატოვების შესახებ განცხადება ნოემბერში დაწერა:

"შეწყალების კომისიის განახლებას აპირებს პრეზიდენტიო, მაგრამ ერთი უზუსტობაა — მე ჯერ კიდევ მარგველაშვილის პრეზიდენტობის დროს, კომისიის ბოლო სხდომის შემდეგ, ნოემბერში თავად დავწერე განცხადება", — წერს გიგაური ფეისბუქპოსტში.

პრეზიდენტის ადმინისტრაციამ On.ge-ს დაუდასტურა, რომ შეწყალების კომისია რამდენიმე წევრმა უკვე დატოვა, თუმცა მათ ვინაობას არ აკონკრეტებს. ადმინისტრაცია გეგმავს, რომ კომისია ახალი წევრებით დააკომპლექტოს.