საკრებულოსთან მიმდინარე აქციაზე დაპირისპირება მოხდა. ინფორმაციას რუსთავი 2 ავრცელებს.

მერის გადადგომის მოთხოვნით აქცია მესამე სექტორმა დაიწყო. მათ შეკრებას ხმაური და დაპირისპირება მოჰყვა.

ორმა მოქალაქემ აქციის მონაწილეებს უთხრა, რომ ისინი ფინანსდებოდნენ კონკრეტული პოლიტიკური ძალების მხრიდან და მან გააპროტესტა შეკრების მიზეზი, რასაც ტერიტორიაზე მცირე დაპირისპირება მოჰყვა.

ინტერპრესნიუსის ინფორმაციით სიტყვიერი დაპირისპირება საპატრულო პოლიცის ჩარევის შემდეგ დასრულდა. პოლიციის თანამშრომლებმა მოქალაქეები აქციის მონაწილეთა ჯგუფს გაარიდეს.

მოქალაქეებმა, რომლებიც აქციის მონაწილეებს დაუპირისპირდნენ, აღნიშნეს, რომ საკრებულოსთან შეკრებილი ადამიანები, მათ შორის „პარტიზანი მებაღეები“ მარგინალები არიან და ნარმანიას საწინააღმდეგო აქციებს ფულის სანაცვლოდ მართავენ.

თავად აქციის მონაწილეების თქმით, ისინი დავით ნარმანიას უღირს საქციელს აპროტესტებენ.

“ჩვენ გავმართეთ მსვლელობა დავით ნარმანიას უღირსი საქციელის გამო. ქართული ოცნების სახე, რომელიც ნარმანიას სახით არის ხელდასმული ბიძინა ივანიშვილის მიერ. ჩვენ ვაპროტესტებთ მათ ხელისუფლებაში ყოფნას, მათ მავნებლურ საქციელს. ვითხოვთ, რომ მან დატოვოს თანამდებობა იმიტომ, რომ ის არის სრულიად შეუფერებელი ადამიანი, ის არის უუნარო, უსაქმური ადამიანი და ამას ყველაფერს დაემატა ის, რომ ის არის უზრდელი ადამიანი, რომელმაც არ იცის როგორ უნდა მოექცეს თბილისში მაცხოვრებელ ადამიანებს“

დღეს, 4 საათზე დავით ნარმანია საკრებულოში მოხსენებით უნდა წარსდგეს, ამ წუთებში კი მიმდინარე ტერიტორიაზე მისი გადადგომის მოთხოვნით აქცია მიმდინარეობს.