რუსთავი 2-ის ინფორმაციით, რიოს ოლიმპიური თამაშების დაწყებამდე ერთი დღით ადრე ქართველმა მოცურავე ირაკლი ბოლქვაძემ დოპინგკონტროლი ვერ გაიარა. ჩატარებული ტესტი დადებით პასუხს აჩვენებს. როგორც საწყლოსნო ფედერაციის პრეზიდენტი დავით რურუა აცხადებს სპორტსმენი დოპინგის მიღებას უარყოფს:

"თავს იკლავს, არ მიმიღიაო. სინჯის მეორედ აღებას რამდენიმე კვირა სჭირდება, ჩვენ ეს პროცესი რომ არ გაგვეჩერებინა ირაკლი რევიშვილით ჩავანაცვლეთ".

სპორტსმენის უდანაშაულობას მხარს უჭერს მოცურავეთა ეროვნული ნაკრების მთავარი მწვრთნელი ზურაბ ხომასურიძეც. იგი აცხადებს, რომ ბოლქვაძე ტესტს მეორედაც გაივლის, თუმცა შეჯიბრი ხვალ იწყება და პასუხები უბრალოდ ვეღარ მოესწრება.

რიოს ოლიმპიური თამაშები ხვალ დაიწყება, სადაც საქართველოს სახელით ირაკლი ბოლქვაძის გამოკლებით სულ ოცდათვრამეტი სპორტსმენი იასპარეზებს.