თურქეთში სახელმწიფო გადატრიალების მცდელობის შემდეგ, ქვეყნის ხელისუფლების მიერ გადადგმულ ნაბიჯებთან დაკავშირებით, ევროსაბჭო მოუწოდებს თურქეთს, არ დაარღვიოს ადამიანის უფლებები და იმოქმედოს კანონის შესაბამისად. ამის შესახებ ინფორმაციას BBC ავრცელებს.

ევროსაბჭოს გენერალური მდივანი, ტურბიორნ იანგლანდი, რომელიც თურქეთში ოფიციალური ვიზიტით იმყოფება, ამბობს, რომ ესმის თურქეთის ქმედება იმ პირთა მიმართ, რომლებიც გადატრიალების უკან იდგნენ, თუმცა მოუწოდა თურქეთს მიიღოს უსაფრთხოების სამართლებრივი ზომები.

მან განმარტა, რომ ევროპა გაოგნებულია იმ ფაქტით, როგორ მოახერხეს ამბოხებულებმა თურქეთის სამხედრო დანაყოფებსა და სასამართლო სისტემაში ასეთი მასშტაბური და ქმედით ქსელი შეექმნათ.

იანგლანდი იმ ორგანიზაციას უდგას სათავეში, რომელიც ადამიანის უფლებებს საბჭოს 47 წევრ ქვეყანაში აკვირდება, რომელთა შორის ერთ-ერთი თურქეთია.

გუშინ სახელმწიფო გადატრიალებისა და ფეტულა გიულენთან შესაძლო კავშირის ბრალდებით, თურქეთში ფეხბურთის 94 მსაჯი გაათავისუფლეს. ამასთან, 2 აგვისტოს თურქეთის წამყვანი სამხედრო ჰოსპიტალის - გიულხანეს 50 თანამშრომელიც დააკავეს, დაკავების ორდერია გაცემული კიდევ 50 თანამშრომელზე.

ერდოღანი აგრძელებს ე.წ. წმენდას და განმარტავს, რომ თუ ქვეყნის სამხედრო ნაწილების რეკონსტრუქცია არ მოხდება, გიულენის მხარდამჭერები ისევ ეცდებიან ამბოხის დაწყებას.

ბოლო მონაცემებით:

  • გარდაცვლილია 246 ადამიანი.
  • დაშავებულია 1400-ზე მეტი მოქალაქე.
  • დახურულია 130 მედია საშუალება.
  • გაცემულია 42 ჟურნალისტის დაკავების ორდერი.
  • სამსახურიდან გაშვებულია 66 ათასამდე საჯარო მოხელე.
  • ქვეყანაში სამთვიანი საგანგებო მდგომარეობაა გამოცხადებული.

15 ივლისს თურქეთში ხელისუფლების დამხობის მიზნით ქვეყნის რამდენიმე ლოკაციაზე შეიარაღებული დაჯგუფების თავდასხმას 300-მდე ადამიანის სიცოცხლე ემსხვერპლა, აჯანყებასთან კავშირის ბრალდებით თანამდებობიდან გადააყენეს და დააკავეს ათასობით მოსამართლე, მაღალი თანამდებობაზე მყოფი სამხედროები, პოლიციელები და სამოქალაქო პირები.

თურქეთში მომხდარი ამბოხის გამომწვევი მიზეზების, მისი ორგანიზატორებისა და მომხდარის შესახებ დეტალურ ინფორმაციას შეგიძლიათ გაეცნოთ აქ: