იაპონიის ყოფილი თავდაცვის მინისტრი იურიკო კოიკე ტოკიოს მერად აირჩიეს. კოიკე პირველი ქალია, რომელიც იაპონიის დედაქალაქს ჩაუდგება სათავეში. ინფორმაციას BBC ავრცელებს.

იურიკო კოიკე კენჭს იყრიდა როგორც დამოუკიდებელი კანდიდატი, 2,9 მილიონზე მეტი ხმა მიიღო და თავისი ოპონენტები დიდი სხვაობით ჩამოიტოვა.

მისი მთავარი გამოწვევა ფინანსური პრობლემების დარეგულირება იქნება, რომელიც 2020 წლის ოლიმპიური თამაშებისთვის მზადებას ახლავს თან.

კოიკე იაპონიის პრემიერ-მინისტრის შინზო აბეს ლიბერალ დემოკრატიული პარტიის წევრია, თუმცა კენჭი დამოუკიდებლად იყარა.

მისი ორი წინამორბედის ფინანსურ მაქინაციებთან დაკავშირებული სკანდალის შემდეგ, ტოკიოს რეპუტაციაზე, როგორც ოლიმპიური თამაშების მასპინძელზე პასუხისმგებლობა კოიკეს ეკისრება.

"ოლიმპიური თამაშები გვიახლოვდება. მინდა ეს პერიოდი გამოვიყენო როგორც შანსი ახალი ტოკიოს ასაშენებლად", თქვა კოიკემ თავისი კამპანიის დასაწყისში.