ბრაზილიის ნაკრებისა და მილანის ყოფილმა ფეხბურთელმა რიკარდო კაკამ თავისი კარიერის მადრიდული და მილანური წლები გაიხსენა და ხაზი გაუსვა, რომ რეალში ყოფნისას მას მოურინიო არ ენდობოდა.

"2009 წელს მადრიდის რეალის შემოთავაზებას დავთანხმდი, მაგრამ ამის შემდეგ გავნადგურდი, რადგან იმას ვეღარ ვაკეთებდი, რასაც მილანში".

"მთლიანად დავიკარგე. იტალიაში ყველას ვუყვარდი, ესპანეთში კი ყველას უნდოდა, რომ წავსულიყავი. ამის გარდა, მოურინიო რთული მწვრთნელი აღმოჩნდა. რამდენჯერაც ვიფიქრე, რომ შანსს მომცემდა, იმდენჯერ საპირისპირო მოხდა", - აღნიშნა კაკამ.

მისივე თქმით, მან თავი ბედნიერად მხოლოდ მილანში დაბრუნების შემდეგ იგრძნო.

"რეალში არ მეძლეოდა შანსი, რომ რაიმე დამემტკიცებინა. ვვარჯიშობდი ბევრს, ვიბრძოდი, ადგილსაც ვითხოვდი, მაგრამ მწვრთნელის ნდობის გარეშე ვერაფერს გავხდებოდი. მილანში დაბრუნებისას კი უბედნიერესი ვიყავი".