ოკუპირებულ ახალგორში საგანგებო რეჟიმი დააწესეს და მობილიზებულია დე ფაქტო რესპუბლიკის ძალოვანი სტრუქტურების სპეცრაზმები. ამის შესახებ რადიო თავისუფლება ავრცელებს ინფორმაციას, საკუთარ წყაროებზე დაყრდნობით.

რადიო თავისუფლების ცნობით, სპეცრაზმელები ახალგორში შემსვლელ და გამომსვლელ ავტომანქანებს ჩხრეკენ და ადგილობრივ მოსახლეობას ეუბნებიან, რომ საგანგებო მდგომარეობა უკავშირდება რუსეთის პრეზიდენტის მოახლოებულ არჩევნებს.

რადიო თავისუფლების წყაროების ცნობითვე, ოკუპირებული ახალგორის გამგებელმა, ფილიპ ხაჩიროვმა დაბის მოსახლეობა შეკრიბა და მიტინგი გამართა. ხაჩიროვმა ახალგორელებს მოუწოდა, პროვოკაციის რისკის გამო სიფრთხილე გამოიჩინონ.

On.ge დაუკავშირდა საქართველოს სახელმწიფო უსაფრთხოების სამსახურს და მათ ინფორმაციას მიღებისთანავე შემოგთავაზებთ.