ხორავას ქუჩაზე, პირველ დეკემბერს მომხდარ მკვლელობაში ბრალდებული არასრულწლოვანი, რომელსაც დღეს დაუსწრებლად პატიმრობა შეეფარდა, პოლიციას ჩაბარდა.

მანამდე, ადვოკატმა ტარიელ კაკაბაძემ გაავრცელა განცხადება, რომ ოჯახი აპირებდა ბრალდებულის საგამოძიებო ორგანოში მიყვანას, რის შესახებაც მან მათ საადვოკატო კონსულტაცია გაუწია.

პირველ დეკემბერს, თბილისში, ხორავას ქუჩაზე არასრულწლოვნებს შორის ურთიერთშელაპარაკების შედეგად მოკლეს ორი მოზარდი. ლევან დადუნაშვილი საავადმყოფოში მიყვანამდე გარდაიცვალა. დავით სარალიძეს საავადმყოფოში სამი ოპერაცია გაუკეთდა, თუმცა ის მომხდარიდან მეორე დღეს გარდაიცვალა.

საქმეზე ბრალი თავდაპირველად ორ არასრულწლოვანს წაუყენეს. დღეს, 4 დეკემბერს კი, შინაგან საქმეთა სამინისტროს განცხადებით, ხორავას ქუჩაზე მომხდარი განზრახ მკვლელობის ფაქტთან დაკავშირებით კიდევ სამი პირი დააკავეს. მათ დანაშაულის დაფარვისთვის ედებათ ბრალი. უწყების თქმით, დაკავებულებიდან ორი ძებნაში მყოფ არასრულწლოვანს მიმალვაში დაეხმარა.