საქართველოს პრეზიდენტი, გიორგი მარგველაშვილი ამბობს, რომ კონსტიტუციის პროექტს ხელი სახელმწიფოს ინტერესების გამო მოაწერა. მისი თქმით, ამ დოკუმენტზე ხელის არმოწერა იქნებოდა იმის ნიშანი, რომ საქართველოში ვერ შედგა დემოკრატია, რადგან მასზე პრეზიდენტის ხელმოწერა არ არის.

მისი თქმით, საკონსტიტუციო კომისიამ ისეთი დოკუმენტი შექმნა, რომელსაც ერთპარტიული ხელმოწერა ჰქონდა.

"ჩემს წინაშე დადგა დილემა: გამეგრძელებინა ის პოლიტიკური პროცესი, რომელიც მე მარტომ დავიწყე, თუმცა, საბოლოოდ მარტო თავის პულტებთან დარჩა ქართული ოცნება, თუ მომეწერა კონსტიტუციისთვის ხელი", - ამბობს პრეზიდენტი.

მისი თქმით, კონსტიტუციის პროექტზე ხელისმოწერით მან გადადგა რთული ნაბიჯი, რომელმაც ბევრი ადამიანის უკმაყოფილება გამოიწვია.

"მე დღეს მინდა მათ ვუთხრა, რომ ყოველთვის, როდესაც ჩემს წინ იქნება დილემა, ჩემს პოლიტიკურ ინტერესებსა და სახელმწიფოს შორის,ბუნებრივია მე სახელმწიფოს ინტერესებს პრიორიტეტულად დავაყენებ", - განმარტა გიორგი მარგველაშვილმა.

აქართველოს პრეზიდენტმა საკონსტიტუციო ცვლილებებს ხელი 19 ოქტომბერს მოაწერა. მანამდე, 9 ოქტომბერს მან მესამე მოსმენით მიღებულ კონსტიტუციის პროექტს ვეტო დაადო, თუმცა უმრავლესობამ პრეზიდენტის შენიშვნები არ გაითვალისწინა.