ორგანიზაციამ ბავშვი და გარემო ქალაქ რუსთავში მიტოვების რისკის ქვეშ მყოფი ბავშვებისთვის დღის ცენტრი საპოვნელა გახსნა.

დღის ცენტრი ჩამოყალიბდა საქართველოს ბანკის მხარდაჭერით შექმნილ სივრცეში, სადაც 2009-2023 წლებში მცირე საოჯახო ტიპის 10 ბავშვზე გათვლილი სახლი ფუნქციონირებდა. 2024 წლიდან კი აღნიშნულ სივრცეში დღის ცენტრი საპოვნელა ამოქმედდა.

დღის ცენტრი მრავალმხრივ მხარდაჭერას უწევს მიტოვების რისკის ქვეშ მყოფ და სოციალურად დაუცველ ბავშვებს. ცენტრის პროგრამა მოიცავს საგანმანათლებლო, ფსიქო-სოციალურ და განვითარების მხარდამჭერ აქტივობებს, რომლებიც ბავშვების ყოველდღიური საჭიროებებისა და საზოგადოებაში ინტეგრაციის ხელშეწყობაზეა ორიენტირებული.

ორგანიზაციის წარმომადგენლის, ნინო იაშვილის თქმით, მსგავსი სივრცეები ბავშვებისთვის უსაფრთხო და მხარდამჭერი გარემოს შექმნაში მნიშვნელოვან როლს ასრულებს.

"ჩვენთვის მნიშვნელოვანია, რომ ბავშვებს ჰქონდეთ ადგილი, სადაც მიიღებენ არა მხოლოდ ყოველდღიურ მხარდაჭერას, არამედ განვითარების, განათლებისა და სოციალიზაციის შესაძლებლობას", — აღნიშნავს ნინო, — "საპოვნელა სწორედ ასეთი სივრცეა, რომელიც ბავშვებს სტაბილურ და მზრუნველ გარემოს სთავაზობს".

ბავშვი და გარემო 1995 წლიდან ბავშვთა უფლებების დაცვის, ფსიქო-სოციალური მხარდაჭერისა და ინკლუზიური სერვისების განვითარების მიმართულებით მუშაობს. ორგანიზაცია თბილისსა და რეგიონებში სხვადასხვა პროგრამისა და ცენტრის საშუალებით ყოველდღიურად ეხმარება სოციალურად დაუცველ, სპეციალური საჭიროებებისა და განვითარების შეფერხების მქონე ბავშვებსა და მათ ოჯახებს.