19 მარტს, გაერთიანებული სამეფოს, საფრანგეთის, გერმანიის, იტალიის, ნიდერლანდების, იაპონიისა და კანადის ლიდერებმა ჰორმუზის სრუტის ირგვლივ განვითარებულ მოვლენებთან დაკავშირებით საგანგებო ერთობლივი განცხადება გაავრცელეს.

დოკუმენტში ხაზგასმულია რეგიონში არსებული კრიტიკული მდგომარეობა და მკაცრადაა დაგმობილი ირანის ქმედებები, რომლებიც საფრთხეს უქმნის გლობალურ სტაბილურობას.

"ჩვენ უმკაცრესად ვგმობთ ირანის მიერ ბოლო დროს განხორციელებულ თავდასხმებს ყურეში მყოფ შეუიარაღებელ კომერციულ გემებზე, თავდასხმებს სამოქალაქო ინფრასტრუქტურაზე, მათ შორის ნავთობისა და გაზის ობიექტებზე, და ირანული ძალების მიერ ჰორმუზის სრუტის დე ფაქტო ჩაკეტვას. ჩვენ გამოვხატავთ ღრმა შეშფოთებას ესკალაციური კონფლიქტის გამო. მოვუწოდებთ ირანს, დაუყოვნებლივ შეწყვიტოს მუქარა, ნაღმების დაგება, თავდასხმები დრონებითა და რაკეტებით და სხვა მცდელობები, რომლებიც მიზნად ისახავს კომერციული ნაოსნობისთვის სრუტის ბლოკირებას, და დაემორჩილოს გაეროს უშიშროების საბჭოს 2817-ე რეზოლუციას", — ნათქვამია ლიდერების განცხადებაში.

მსოფლიო სახელმწიფოების მეთაურები აღნიშნავენ, რომ ნაოსნობის თავისუფლება საერთაშორისო სამართლისა და გაეროს საზღვაო სამართლის კონვენციის ფუნდამენტური პრინციპია. მათი თქმით, ირანის ქმედებების უარყოფითი შედეგები აისახება ადამიანებზე მსოფლიოს ყველა კუთხეში, განსაკუთრებით კი ყველაზე დაუცველ ფენებზე.

განცხადებაში განსაკუთრებული ყურადღება ეთმობა ენერგეტიკულ უსაფრთხოებას და გაეროს უშიშროების საბჭოს გადაწყვეტილებების აღსრულებას.

"გაეროს უშიშროების საბჭოს 2817-ე რეზოლუციის შესაბამისად, ხაზს ვუსვამთ, რომ საერთაშორისო ნაოსნობაში მსგავსი ჩარევა და ენერგომომარაგების გლობალური ჯაჭვების შეფერხება საფრთხეს უქმნის საერთაშორისო მშვიდობასა და უსაფრთხოებას. ამ თვალსაზრისით, მოვითხოვთ დაუყოვნებლივ და ყოვლისმომცველ მორატორიუმს სამოქალაქო ინფრასტრუქტურაზე, მათ შორის ნავთობისა და გაზის ობიექტებზე თავდასხმებზე. ჩვენ გამოვხატავთ მზადყოფნას, წვლილი შევიტანოთ შესაბამის ძალისხმევაში სრუტეში უსაფრთხო გადაადგილების უზრუნველსაყოფად. მივესალმებით იმ ქვეყნების მზაობას, რომლებიც ჩართულნი არიან მოსამზადებელ დაგეგმარებაში", — აღნიშნულია განცხადებაში.

გარდა პოლიტიკური და სამხედრო მზაობისა, მოკავშირეები ეკონომიკური სტაბილიზაციის გეგმებზეც საუბრობენ. ლიდერები მიესალმებიან ენერგეტიკის საერთაშორისო სააგენტოს გადაწყვეტილებას სტრატეგიული ნავთობის რეზერვების კოორდინირებული გამოთავისუფლების შესახებ და აანონსებენ მუშაობას მწარმოებელ ქვეყნებთან მოპოვების გაზრდის მიზნით.

"ჩვენ ასევე ვიმუშავებთ ყველაზე მეტად დაზარალებული ქვეყნების მხარდასაჭერად, მათ შორის გაეროსა და საერთაშორისო ფინანსური ინსტიტუტების (IFIs) მეშვეობით. საზღვაო უსაფრთხოება და ნაოსნობის თავისუფლება ყველა ქვეყნის ინტერესშია. მოვუწოდებთ ყველა სახელმწიფოს, პატივი სცენ საერთაშორისო სამართალს და დაიცვან საერთაშორისო კეთილდღეობისა და უსაფრთხოების ფუნდამენტური პრინციპები", — წერია გავრცელებულ განცხადებაში.