19 თებერვალს Pixar-მა Toy Story-ის მეხუთე ნაწილის ტრეილერი გამოუშვა და სერიის ერთ-ერთი ყველაზე საყვარელი პერსონაჟების: ვუდის, ბაზ ლაითიარისა და ჯესის დიდი დაბრუნება დააანონსა. ახალ ფილმში თავიანთ საკულტო როლებს კვლავ ახმოვანებენ ტომ ჰენქსი, ტიმ ალენი და ჯოან კიუსაკი.

ახალი ნაწილი თანამედროვე სამყაროში ტექნოლოგიების გავლენაზეა და სათამაშოების წინაშე სრულიად ახალ გამოწვევას აყენებს. სიუჟეტი იწყება მაშინ, როდესაც ვუდი, ბაზი, ჯესი და მათი მეგობრები ახალ ტიპის სათამაშოს Lilypad-ს ხვდებიან. ეს არის მაღალტექნოლოგიური, ბაყაყის ფორმის ჭკვიანი პლანშეტი, რომელსაც გრეტა ლი ახმოვანებს. მისი გამოჩენა სათამაშოების ჯგუფში დაპირისპირებას იწვევს.

ოფიციალური სინოპსისის მიხედვით, "სათამაშოები დაბრუნდნენ და ამჯერად მათი როლები კითხვის ნიშნის ქვეშ დგება, როცა ისინი Lilypad-ს, რადიკალური იდეების მქონე სრულიად ახალ პლანშეტ მოწყობილობას უპირისპირდებიან. შეიცვლება თუ არა თამაში სამუდამოდ?"

თუმცა ტრეილერიდან ერთმა დეტალმა ინტერნეტში ფანების საყოველთაო განხილვა გამოიწვია, და ეს დეტალი არის ვუდის სიმელოტე:

ვუდი მელოტდება??

ფოტო: Pixar

"ფაქტია, რომ ვბერდებით, უკვე ვუდიც კი მელოტდება", — წერენ მილენიალები ტრეილერის კომენტარებში.

Toy Story 5-ის სცენარი ეკუთვნის ენდრიუ სტენტონს, რომელმაც ასევე იმუშავა სერიის პირველ ორ ნაწილსა და Toy Story 4-ზე (მესამე ნაწილის ავტორი მაიკლ არნდტია). სტენტონი ფილმის რეჟისორობას მაკენა ჰარისთან ერთად ინაწილებს, რომელიც მანამდე Pixar-ის Luca-სა და Elio-ზე მუშაობდა.

"ძალიან სახალისო და ამავდროულად ემოციური მოგზაურობა იყო იმის შესწავლა, როგორ უპასუხებდა ჩვენი საყვარელი, უკვე ლეგენდად ქცეული სათამაშოების გუნდი დღევანდელ ტექნოლოგიურ სამყაროს", — აღნიშნეს რეჟისორებმა ნოემბერში, როდესაც ფილმის პირველი თრეილერი გამოვიდა.

Toy Story 5 კინოთეატრებში 19 ივნისს გამოვა.