კინოგაქირავებაში ჩაშვების შემდეგ, რვა კვირაში დისნეის ზოოტოპია 2-მა ახალი რეკორდი დაამყარა და ჰოლივუდის სტუდიების მიერ შექმნილ ანიმაციურ ფილმებს შორის ყველაზე მაღალი შემოსავალი მოიპოვა — $1.7 მილიარდი, რითაც Pixar-ის Inside Out 2-ს გადაასწრო და ყველა დროის ანიმაციური ფილმების რეიტინგში (ინფლაციის გარეშე) მეორე ადგილზე გადავიდა.

ზოოტოპია 2 ასევე 2025 წლის ჰოლივუდის ყველაზე შემოსავლიანი ფილმის სტატუსითაც დაასრულებს წელს, მან დისნეის კიდევ ერთ რელიზს, Avatar: Fire and Ash-ს აჯობა.

აშშ-ის შიდა ბაზარზე ზოოტოპია 2-მა უკვე გადააჭარბა $400 მილიონს და მოსალოდნელია, რომ მომდევნო 2–3 კვირაში $423 მილიონს მიაღწევს. ამით ის გადაასწრებს A Minecraft Movie-ს და Lilo & Stitch-ის რიმეიქს და 2025 წლის რელიზებს შორის შიდა ბაზრის ლიდერი გახდება.

ინფლაციის გათვალისწინების გარეშე, დისნეის ეკუთვნის ყველა დროის ჰოლივუდის ანიმაციური ფილმების სამეული — და ოთხეული, თუ CGI-რიმეიქს The Lion King ($1.66 მლრდ) ანიმაციად ჩავთვლით. ამ ჯგუფშია Frozen II ($1.45 მლრდ), ხოლო დისნეის გარეთ ყველაზე შემოსავლიანი ჰოლივუდური ანიმაციაა Illumination-ის The Super Mario Bros. Movie ($1.36 მლრდ).

საინტერესოა, რომ შიდა ბაზარზე ზოოტოპია 2 საბოლოოდ მაინც დაახლოებით $200 მილიონით ჩამორჩება Inside Out 2-ს, რომელმაც 2024 წლის ზაფხულში თითქმის $653 მილიონი მოაგროვა. თუმცა ეს სხვაობა სრულად ანაზღაურდა ფილმის ისტორიული წარმატებით ჩინეთში, იქ ზოოტოპია 2 $619 მილიონს მიუახლოვდა და მზადაა გადაასწროს Avengers: Endgame-ს, როგორც ქვეყნის ყველაზე შემოსავლიან ამერიკულ ფილმს.

ამ შედეგებით ზოოტოპია 2 ახლა ყველა დროის ყველაზე შემოსავლიანი ფილმების ტოპ-10-შია (ინფლაციის გარეშე) და მეცხრე ადგილს იკავებს, Spider-Man: No Way Home-ის ($1.92 მლრდ) შემდეგ.

"ეს მიღწევა, უპირველეს ყოვლისა, მსოფლიოს მასშტაბით გულშემატკივრებს ეკუთვნით, რომელთა ენთუზიაზმმაც ეს ყველაფერი შესაძლებელი გახადა. ჩვენ უზომოდ ვამაყობთ ჩვენი კინემატოგრაფისტებით, ჯარედ ბუშით, ბაირონ ჰოვარდით და ივეტ მერინოთი. და Walt Disney Animation Studios-ის მთლიანი გუნდით, რომლებმაც შექმნეს ფილმი, რომელიც აუდიტორიას ყველგან ასე უკავშირდება. ზოოტოპია 2 გამორჩეული მიღწევაა და მადლობას ვუხდით ყველას, ვინც მის შექმნაში მონაწილეობდა", — განაცხადა ალან ბერგმანმა, Disney Entertainment-ის თანათავმჯდომარემ.