შინაგან საქმეთა სამინისტროს განცხადებით, აჭარაში მომხდარ მკვლელობასთან დაკავშირებით დაკავებულია 2 პირი. ორივე მათგანი, 1989 წელს დაბადებული გ.ბ და 1993 წელს დაბადებული თ.შ., წარსულში ნასამართლევია.

გ.ბ-ს ცეცხლსასროლი იარაღის უკანონოდ შეძენა, მისი შენახვა, ტარება და ადამიანის განზრახ მკვლელობა ედება ბრალად, ხოლო თ.შ დანაშაულის შეუტყობინებლობის გამო დააკავეს.

გამოძიების მიხედვით, გ.ბ-მ 2025 წლის 4 ივნისს, ხელვაჩაურის მუნიციპალიტეტში 1992 წელს დაბადებული ბ.ბ ცეცხლსასროლი იარაღით მისსავე მანქანაში მოკლა და მანქანა მდინარეში ჩააგორა, რათა დანაშაული დაეფარა.

დანაშაული 15 წლით თავისუფლების აღკვეთას ითვალისწინებს

თ.შ-მ იცოდა დანაშაულის შესახებ და პოლიციას არ აცნობა. სამართალდამცველებმა ორივე ბრალდებულის სახით დააკავეს.

გამოძიება მიმდინარეობს სისხლის სამართლის კოდექსის 108-ე, 236-ე და 376-ე მუხლებით.