აშშ-მა ბოლო არასანქცირებულ რუსულ ბანკ გაზპრომბანკსაც დაუწესა სანქციები. ამის შესახებ განცხადებას აშშ-ის სახაზინო დეპარტამენტი ავრცელებს.

აშშ-ის სანქციები გლობალური ფინანსური სისტემიდან გამორიცხავს გაზპრომბანკს და მის ექვს შვილობილ კომპანიას, რომლებიც ლუქსემბურგში, ჰონგ-კონგში, კვიპროსში, შვეიცარიასა და სამხრეთ აფრიკაში მდებარეობენ.

აშშ-ის სახაზინო დეპარტამენტის განცხადებაში ნათქვამია, რომ რუსეთი გაზპრომბანკს უკრაინასთან ომისთვის სამხედრო ტექნიკის შესაძენად იყენებდა და მისი დახმარებით უხდიდა თავის ჯარისკაცებს ანაზღაურებას და კომპენსაციებს ომში გარდაცვლილთა ოჯახებს.