ტელეკომპანია რუსთავი 2-ის დირექტორი, ნიკა გვარამია ამბობს, რომ საქართველოს ფინანსთა მინისტრმა, დიმიტრი ქუმსიშვილმა არხის საგადასახადო ინფორმაციის გასაჯაროებით, კანონი დაარღვია. ამის შესახებ გვარამიამ რამდენიმე წუთის წინ ბრიფინგზე განცხადა.

გვარამია საერთაშორისო სასმართლო ინსტიტუტებში ჩივილსა და სახელმწიფოს მიერ რუსთავი 2-სთვის მიყენებული ზარალის ანაზღაურების მოთხოვნას აპირებს.

"ეს არის კონკურენტების სასარგებლოდ თამაში. ტელეკომპანია იმედი რამდენიმე დღეა ცდილობს ამ საკითხზე სიუჟეტის გაკეთებას. ბუნებრივია, ჩვენ ამ ინფორმაციის გამხელისგან თავი შევიკავეთ", - განაცხადა გვარამიამ და დასძინა, რომ ქუმსიშვილმა იმედის ეთერში რუსთავი 2-ის ფინანსებზე შემთხვევით არ ისაუბრა.

მინისტრი აღნიშნავდა, რომ როდესაც ერთი კომპანია გადასახადებს არ იხდის ის არაკონკურენტულ გარემოშია სხვასთან შედარებით და "მეტი ფული რჩება".

"აქვს შესაძლებლობა უკეთესი თანამშრომლები იქირაოს, უკეთესი ტექნიკა შეიძინოს, უკეთესი გადაცემები გააკეთოს, რაც, რა თქმა უნდა, არაკონკურენტულ გარემოს ქმნის", - აღნიშნა ქუმსიშვილმა და დასძინა, რომ მისი საუბარი კონკრეტულად რუსთავი 2-ს არ ეხებოდა.

ეს პირველი შემთხვევა არაა, როცა ფინანსთა მინისტრმა და რუსთავი 2-ის გენერალურმა დირექტორმა არხის ფინანსურ დავალიანებაზე ისაუბრეს. მიმდინარე წლის მარტში ქუმსიშვილმა განაცხადა, რომ ტელეკომპანია რუსთავი 2 თვიდან თვემდე იგროვებდა საბიუჯეტო დავალიანებას. მისივე თქმით, ხელისუფლებამ მიიღო გადაწყვეტილება, რომ ტელეკომპანიის მიმართ არ გაეტარებინა საქართველოს კანონმდებლობით გათვალისწინებული მოქმედებები.

"ეს არის ნათელი მაგალითი, როგორ არ ერევა ხელისუფლება აღნიშნულ პროცესში და რამდენად ნეიტრალურ პოზიციას ინარჩუნებს", - აღნიშნავდა ქუმისშვილმა.

მაშინ, ტელეკომპანია რუსთავი 2-ის გენერალური დირექტორი ადასტურებდა, რომ არხს საბიუჯეტო დავალიანება აქვს, რის შესახებაც საგადასახადო ორგანოები ინფორმირებულები არიან და თანხა განწილადებულია. გვარამია ამბობდა, რომ ტელეკომპანიას დავალიანება ყადაღის გამო დაუგროვდა.

განახლება: საქართველოს ფინანსთა სამინისტროს მტკიცებით, საქართველოს საგადასახადო კოდექსის 39-ემუხლის 1¹ ნაწილის კ ქვეპუნქტის თანახმად, საგადასახადო საიდუმლოებას არ განეკუთვნება და საჯაროა გადასახადის გადამხდელის საგადასახადო დავალიანების შესახებ ინფორმაცია:

"ამდენად, ტელეკომპანიის გენერალური დირექტორის მიერ გაკეთებული შეფასება არის სრული სიცრუე და საზოგადოების შეცდომაში შეყვანის მცდელობა."