აშშ-ში ელეინ ჰოლმა და როლანდ პასარომ, რომელთაც ერთმანეთი სკოლის პერიოდში უყვარდათ, 88 წლის ასაკში იქორწინეს. წყვილი ერთ კლასში 1950-იან წლებში სწავლობდა და სკოლის დამთავრებიდან 50 წლის შემდეგ ერთმანეთს ხელახლა შეხვდა.

მას შემდეგ, რაც ელეინმა და როლანდმა სკოლა დაამთავრეს, მათი გზები გაიყო. ისინი ერთმანეთს 2003 წელს სკოლის დამთავრების 50 წლისთავის აღსანიშნავ წვეულებაზე შეხვდნენ და შეხვედრა ხელმეორედ დაიწყეს.

"ელეინი ყველაზე ჭკვიანი გოგო იყო კლასში. მას პასუხი ყველა კითხვაზე ჰქონდა", — იხსენებს როლანდი.

"როლანდი ვარსკვლავი იყო. ისეთი სიმპატიური, რომ სკოლაში ყველა გოგოს მოსწონდა, მას კი მე მოვწონდი, რაც ძალიან მახარებდა", — ამატებს ელეინი.

როლანდის თქმით, როცა სკოლა დაამთავრა, ზედმეტად პატარა იყო იმისთვის, რომ ვინმესთან სტაბილური ურთიერთობა ჰქონოდა. შემდეგ ორივემ იქორწინეს და შვილებიც ეყოლათ. ელეინი ქმარს დაშორდა, როლანდის ცოლი კი სიმსივნის გამო დაიღუპა.

როლანდი ამბობს, რომ ოჯახის წევრებმა დააძალეს, კლასის შეკრებაზე წასულიყო, სადაც ის ელეინს წლების მერე პირველად შეხვდა.

"იმ ღამით ჩვენ შორის მიზიდულობა იგრძნობოდა. რომ დავემშვიდობე, გადმოიხარა და მაკოცა", — იხსენებს ელეინი.

ელეინის თქმით, მისთვის როლანდი ყველაზე დიდი საყრდენი იყო, როდესაც რამდენიმე წლის წინ შვილი გარდაეცვალა. წყვილი უკვე 20 წელია ერთადაა და ოქტომბერში გადაწყვიტეს, რომ საბოლოოდ დაქორწინებულიყვნენ.

ცერემონიას მათი ოჯახის წევრები, შვილები, შვილიშვილები და შვილთაშვილები დაესწრნენ. ელეინი საკურთხევლამდე შვილებმა მიაცილეს. პირველი ცეკვა წყვილმა იმავე სიმღერაზე შეასრულა, რა სიმღერაზეც სკოლის პერიოდში ცეკვავდნენ ხოლმე.

ელეინის თქმით, როცა ასაკი გემატება და ახალ ადამიანებს იცნობ, მათ არ იციან, ახალგაზრდობაში როგორი იყავი, როლანდი და ის კი ერთმანეთს სკოლის პერიოდიდან იცნობენ.

"მახსოვს, როგორი ლამაზი და აღმაფრთოვანებელი იყო 15 წლის ელეინი და შემიძლია, ვთქვა, რომ ახლაც ზუსტად ისეთივეა", — აღნიშნავს როლანდიც.