დღეს ცნობილი გახდა ახალი შეთანხმების შესახებ, რომლის მიხედვითაც Amazon პრემიუმ კლასის სუპერმარკეტების ქსელ Whole Foods-ს ყიდულობს. გარიგების ღირებულება 13,7 მილიარდი დოლარია. როგორც კომპანიის პრეს-რელიზიდან ხდება ცნობილი Whole Foods-ის ერთ აქციაში კომპანია $42-ს გადაიხდის.

კომპანიების საბოლოო გაერთიანება 2017 წლის მეორე ნახევარშია დაგეგმილი. შეთანხმების თანახმად, Whole Foods შეინარჩუნებს თავის სახელწოდებას, შტაბ-ბინას და უცვლელი დარჩება ტოპ მენეჯმენტის შემადგენლობა. ასევე, არ შეიცვლება კომპანიის აღმასრულებელი დირექტორიც - ამ თანამდებობაზე თავის საქმიანობას ჯონ მაკკი გააგრძელებს.

Whole Foods 1978 წელს ტეხასში დაარსდა. დღესდღეობით კომპანია ამერიკაში სუპერმარკეტების უმსხვილესი ქსელია 460 სუპერმარკეტით. კომპანია ოპერირებს აშშ-ში, დიდ ბრიტანეთში და კანადაში. სულ კომპანიაში 87 000 ადამიანია დასაქმებული. კომპანიის გაყიდვებმა 2016 წელს $16 მილიარდი შეადგინა. Whole Foods ორიენტირებულია ორგანული და ნატურალური საკვების გაყიდვაზე. ის სპეციალიზირებული ქსელია, რომელიც მხოლოდ ნატურალურ პროდუქტს ყიდის, ხელოვნური დანამატების, სასუქების და გასაფერადებლების გარეშე.

Amazon წლების განმავლობაში ცდილობდა შესულიყო სურსათის ინდუსტრიაში და ამ მხრივ მომხმარებელს მრავალი ინოვაციური პროდუქტიც შესთავაზა. თუმცა, სუპერმარკეტების ქსელის ყიდვა კომპანიის ისტორიაში ყველაზე ძვირადღირებული გარიგებაა. მას შემდეგ რაც ცნობილი გახდა შეთანხმების შესახებ ამაზონის ის აქციები 1,5%-ით გაძვირდა.