ბელარუსის საგარეო საქმეთა სამინისტროს განცხადებით, ქვეყნიდან უკრაინელ დიპლომატთა ნაწილს აძევებენ და ტერიტორიის დასატოვებლად 72 საათს აძლევენ. უკრაინსკა პრავდა წერს, რომ საუბარია 12 დიპლომატზე.

მიზეზად უწყება უკრაინის "არამეგობრულ ნაბიჯებს" და კრიტიკულ განცხადებებს ასახელებს. ამის ფონზე ისინი ამტკიცებენ, რომ უკრაინელი ხალხი ნებისმიერ სიტუაციაში იყო და რჩება ბელარუსის "ძმურ ერად, უკრაინა კი მეზობლად".

"სწორედ ეს პოსტულატი ედო საფუძვლად ბელარუსის მუდმივად თავშეკავებულ რეაქციებს. თუმცა ჩვენი აღქმის საზღვრებს ცდება უკრაინის ხელისუფლების ბოლოდროინდელი ქმედებები ბელარუსის მოქალაქეების მიმართ, რომლებიც საკუთარი ნების წინააღმდეგ აღმოჩნდნენ კონფლიქტის ზონაში — ქონების კონფისკაცია, აგდებული დამოკიდებულება დიპლომატებთან და მათი ოჯახის წევრებთან. ეს ყველაფერი ცინიკური მცდელობაა, რომ ერებს შორის სიძულვილი გააღვივონ", — განაცხადეს სამინისტროში.

უწყების თქმით, უკრაინის დიპლომატიური წარმომადგენლობა ბელარუსში 1+4 ფორმატში გააგრძელებს მუშაობას. მათივე თქმით, რადგან პერსონალი აღარ იქნება, მიიღეს გადაწყვეტილება დახურონ ბრესტში უკრაინის გენერალური საკონსულო. ამის ფონზე ბელარუსში აცხადებენ, რომ 15 აპრილამდე აწესებენ უვიზო რეჟიმს უკრაინიდან გამოსული პირებისთვის.

უკრაინამ და საერთაშორისო თანამეგობრობამ არაერთხელ გააკრიტიკა ბელარუსი რუსეთის მხარდაჭერის გამო. ოფიციალურად ბელარუსის ჯარები ომში ჩართული არ არის, თუმცა უკრაინა აცხადებს, რომ მათ ტერიტორიას რუსეთი უკრაინული დასახლებების დასაბომბად იყენებს.

რამდენიმე დღის წინ გავრცელდა ვიდეო, რომელშიც ჩანდა, რომ უკრაინელმა მესაზღვრემ ბელარუსის ელჩს 30 ვერცხლი გადასცა და მოუწოდა ის მათი სასაზღვრო დაცვის უფროსისთვის გადაეცათ, როგორც ზურგში დარტყმისა და ღალატის სიმბოლო.

დამატებითი ინფორმაცია უკრაინაში მიმდინარე მოვლენებზე განახლებად რეჟიმში შეგიძლიათ ნახოთ აქ:

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში