მარნეულში, სოფელ ყიზილაჯლოში, 83-ე საარჩევნო უბანზე დაპირისპირების შედეგად დაშავებულ გირჩის წევრს ტვინის შერყევა აქვს.

"ძვლების მოტეხილობა, ან რამე სერიოზული დაზიანება არ არის, კომპიუტერული ტომოგრაფია ჩატარდა, თუმცა ის მაინც მოთავსდა კლინიკაში დაკვირვების ქვეშ", — განუცხადეს On.ge-ს ავერსის კლინიკაში.

როგორც ყიზილაჯლოში ნაციონალური მოძრაობის წარმომადგენელმა განაცხადა, დაპირისპირება მოჰყვა გირჩის წევრის მხრიდან იმის მითითებას, რომ უბანზე არარეგისტრირებული პირი შევიდა.

"მუშაობის პროცესში ბატონმა ირაკლიმ მიუთითა ერთ-ერთ არარეგისტრირებულ პიროვნებას, რომელიც შემოვიდა, თუ რატომ ხდება ეს. არასწორად იყო შემოსული, არასწორად აწარმოებდა რეგისტრაციას და მან შეურაცხყოფა მიაყენა სიტყვიერი, რატომ ხარ შენ აქ, ვინ გკითხავს შენ, შემდეგ კიდევ შემოცვივდნენ, როგორც წარმომადგენლები, ისე სხვა არარეგისტრირებული ხალხი, ერთი 40 კაცი, რომლებმაც გაიწიეს, ხელი ჰკრეს, ჩემზეც იყო გამოწვევა, თუმცა გავაჩერე", — ამბობს ნაციონალური მოძრაობის წარმომადგენელი.

ინციდენტი დაახლოებით 19:00 საათზე მოხდა, მანამდე კი 48-ე საარჩევნო უბანზე ირაკლი ქველაძემ თქვა, რომ ამომრჩეველს ბიულეტენი რეგისტრაციის გარეშე მისცეს, ამას სიტყვიერი დაპირისპირება მოჰყვა, რის გამოც ქველაძე სამმართველოში გამოკითხვაზე გადაიყვანეს.